17.04.2026, 01:30
Ет бағасын реттеу үшін үшжақты меморандумға қол қойылды
Құжат ішкі нарықты басым түрде қамтамасыз етуді және өндірушілердің тіркелген босату бағасын қарастырады
15 сәуірде Сауда және интеграция министрлігі Ауыл шаруашылығы министрлігімен және Қазақстан мал өсірушілер одағымен бірлесіп, сиыр еті бағасын тұрақтандыруға бағытталған үшжақты ынтымақтастық меморандумына қол қойды. Құжаттың негізінде тараптардың ішкі нарықтағы баға тұрақтылығын қамтамасыз ету, әлеуметтік шиеленісті болдырмау және бизнестің әлеуметтік жауапкершілігін арттыруға деген өзара мүдделілігі жатыр.
Меморандум шарттарына сәйкес, Қазақстан мал өсірушілер одағы ішкі нарықты ет өнімдерімен басым тәртіпте қамтамасыз етуге және тапшылыққа жол бермеуге міндеттенеді. Сонымен қатар, сиыр етінің экспорттық көлемінің кемінде 15%-ын сауда желілері арқылы ішкі нарыққа жеткізу көзделген. Сондай-ақ одақ аккредиттелген экспорттаушылардың қызметін үйлестіріп, сиыр етін өндірушілердің белгіленген босату бағасы бойынша — ҚҚС-сыз бір килограмына 3 275 теңге деңгейінде жеткізуді қамтамасыз етеді.
Бұл ретте көрсетілген баға өндірушілердің босату бағасы болып табылатыны және бөлшек саудадағы соңғы құнды көрсетпейтіні атап өтіледі. Бөлшек бағаның қалыптасуына тасымалдау, сақтау, тиеу-түсіру жұмыстары және басқа да операциялық шығындар әсер етеді.
Меморандум аясында Ауыл шаруашылығы министрлігі мемлекеттік саясатты қалыптастыру кезінде саланың ұсыныстарын қарастырады, сондай-ақ ішкі нарық толық қамтамасыз етілген жағдайда экспорттық квоталарды арттыру мүмкіндігін қарастырады.
Сауда және интеграция министрлігі өз кезегінде ішкі нарықтағы бағаға мониторинг жүргізеді, сауда желілерімен өзара іс-қимылды үйлестіреді, өндірушілер мен бөлшек сауда субъектілері арасында тікелей келісімшарттар жасасуға ықпал етеді, сондай-ақ сауда үстемесінің рұқсат етілген деңгейінің сақталуын бақылайды.
