02.06.2026, 23:52
Қазақстанда жыл басынан бері ет өндірісі 338 мың тоннадан асты
Ауыл шаруашылығы жануарлары санының өсуі елдегі мал шаруашылығы өнімдерін өндіру көлемінің артуына ықпал етуде
Қазақстанның мал шаруашылығы саласы тұрақты оң динамиканы көрсетуді жалғастыруда. Елде ауыл шаруашылығы жануарларының негізгі түрлерінің саны артып, бұл өз кезегінде мал шаруашылығы өнімдерін өндіру көлемінің ұлғаюына әсер етуде.
2026 жылғы 1 мамырдағы жағдай бойынша ірі қара мал саны 9,8 млн басқа жетті, бұл өткен жылдың сәйкес кезеңімен салыстырғанда 325,2 мың басқа артық. Қой саны 23,5 млн басты құрап, 363,1 мың басқа өсті. Жылқы саны 339,8 мың басқа көбейіп, 5,1 млн басқа жетті. Түйе саны 322 мың басты құрап, өткен жылмен салыстырғанда 7,5 мың басқа артты. Құс саны 291,5 мың басқа көбейіп, 48,2 млн басқа жетті.
Ауыл шаруашылығы жануарлары санының өсуі саланың өндірістік көрсеткіштеріне оң әсерін тигізуде. 2026 жылдың қаңтар–сәуір айларында барлық ет түрлерін сою салмағында өндіру көлемі 338,2 мың тоннаны құрады, бұл 2025 жылдың сәйкес кезеңімен салыстырғанда 11 мың тоннаға көп.
Ең жоғары өсім сиыр етін өндіруде тіркелді. Оның көлемі 112,9 мың тоннаға жетіп, өткен жылмен салыстырғанда 6,5 мың тоннаға артты. Қой етін өндіру көлемі 34,7 мың тоннаны құрап, 2,6 мың тоннаға көбейді. Жылқы етін өндіру 39,8 мың тонна болып, өткен жылғы көрсеткіштен 1,4 мың тоннаға жоғары болды.
Саланы одан әрі дамыту және өндіріс көлемін арттыру мақсатында «Жайлау» жеңілдетілген несиелеу бағдарламасы іске қосылуда. Бағдарлама жайылымдық мал шаруашылығын қолдауға және жайылым инфрақұрылымын дамытуға бағытталған. Қаржыландыру жылдық 6% мөлшерлемемен 10 жылға дейін беріледі.
Өндіріс көлемінің артуы мал шаруашылығының тұрақты дамуын, шаруашылықтардың өндірістік әлеуетінің нығаюын және ішкі нарықты қамтамасыз ету үшін жеткілікті ресурстардың бар екенін көрсетеді.
Биылғы жылдың сәуір-мамыр айларында байқалған қой еті бағасының өсуі уақытша әрі маусымдық сипатта болды. Бағаның өсуіне негізгі себеп ретінде мамыр айының соңына сәйкес келген Құрбан айт мерекесі қарсаңындағы және мереке кезіндегі дәстүрлі сұраныстың артуы аталады.
Ұлттық статистика бюросының мәліметінше, қазіргі уақытта ел бойынша қой етінің орташа бағасы килограмына 4 209 теңгені құрайды. Сонымен қатар қой етінің сатып алу бағасының шамамен 200 теңгеге төмендегені тіркелуде.
Осылайша, бұрын байқалған баға өсімі өнім тапшылығымен байланысты емес. Қазіргі өндірістік көрсеткіштер саланың тұрақты дамуын және ішкі нарықтағы мал шаруашылығы өнімдерінің жеткілікті ұсынысын растайды.
