19.01.2026, 15:07
Шикізат мәселесі: Жамбыл облысындағы Fufeng Group зауыты Ресейде жүгері контрактациясын бастады
Жаңа зауытты шикізатпен қамту үшін жүгері импортына жүгіну қажет болды
Жамбыл облысында астықты терең өңдеу бойынша жаңа зауыттың өндірістік қуаттарын толық жүктеу мақсатында Shengtai Biotech компаниясы (қытайлық Fufeng Group құрылымы) шикізат іздеу аясында Ресей нарығына шықты. Қазақстанға жеткізу үшін жүгеріні контрактациялау Саратов облысында басталып кетті.
Инвестордың импортқа жүгінуі Қазақстандағы сұраныс пен ұсыныстың қазіргі теңгеріміне байланысты. Қазіргі уақытта республика ішінде өндірілетін жүгері көлемі жобаның өсіп келе жатқан қажеттіліктерін толық қамтамасыз етуге жеткіліксіз.
Құны 175 млрд теңгені құрайтын инвестициялық жоба өндіріс көлемін кезең-кезеңімен ұлғайтуды жалғастыруда. 2025 жылғы жоспарлы көрсеткіш 500 мың тонна өңдеу болса, 2026 жылы зауыттың қуаты екі есеге артып, 1 млн тоннаға жетуі тиіс. Ал 2027 жылдан бастап 3 млн тонна деңгейіне шығу көзделіп отыр.
Кәсіпорын Қытай мен Еуропа елдеріне экспортқа бағытталған жоғары қосылған құны бар өнімдер — аминқышқылдары, крахмал және глюкоза өндіруге маманданған.
Ішкі нарық әзірге өңдеушінің сұранысына ілесе алмай отыр. Қазақстандағы жүгерінің жалпы өнімі 2024 жылы 1 млн тонна деңгейінде қалып, зауыт толық қуатқа шықпай тұрып-ақ ішкі тұтыну көлемімен толық игерілген.
Өтпелі қалдықтар бойынша жағдай да төмендеуді көрсетеді: өткен жылдың желтоқсан айының басында республикадағы жүгері қоры 269 мың тонна деп бағаланды, бұл алдыңғы кезеңдегі 302 мың тоннамен салыстырғанда аз. 2025 жылғы өнім бойынша ресми қорытынды деректер әлі жарияланған жоқ, алайда зауыт орналасқан өңірде — Жамбыл облысында — тапшылықтың бар екені қазірдің өзінде айқын.
Осыған жауап ретінде ҚР Ауыл шаруашылығы министрлігі алдағы маусымда жүгері егіс алқаптарын кеңейтуді болжап отыр. Биыл жүгері егістігінің көлемі шамамен 43 мың гектарға ұлғайып, жалпы алаңы 217,5 мың гектарға жетуі жоспарлануда.
Shengtai Biotech-тің Ресей нарығына шығуы РФ-тың экспорттық ағындарын қайта құру кезеңімен тұспа-тұс келіп отыр. Салалық сарапшылардың пікірінше, Қазақстандағы қытайлық өңдеуші бұрын Ресейдің экспорттық жүгерісінің 70%-ына дейінін сатып алып келген, бірақ логистикалық және экономикалық қиындықтарға байланысты белсенділігін төмендеткен ирандық контрагенттерді сәтті алмастыра алады. Осылайша, қазақстандық зауыт Поволжье фермерлері үшін негізгі балама өткізу арнасына айналып отыр.
