04.03.2026, 04:50
Ақмола облысында алты жаңа көкөніс қоймасы салынады
Заманауи қоймалар өнім шығынын азайтып, сақтау мерзімін ұзартады
2026 жылы Ақмола облысында көкөніс өнімдерін сақтауға арналған алты заманауи нысанды пайдалануға беру жоспарланып отыр. Бұл туралы Өңірлік коммуникациялар қызметінде хабарланды.
Ең ірі көкөніс қоймасы бір мезетте 12 мың тонна өнім сақтауға мүмкіндік беретін қуаттылықпен Қосшы қаласында салынады. Жылына 6 мың тонна өнім сақтай алатын тағы бір ірі қойма Аршалы ауданында бой көтереді. Целиноград ауданында 3 мың тоннаға арналған қойма салу жоспарланған. Көкшетау қаласында жалпы сыйымдылығы 5 мың тонна болатын екі нысан салынады. Тағы бір 3 мың тонналық көкөніс қоймасы Степногорск қаласында пайда болады.
Жобаларды іске асыру барысында өнімді сақтау сапасына ерекше назар аударылады. Жаңа нысандар автоматтандырылған климаттық бақылау және мәжбүрлі желдету жүйелерімен жабдықталады. Бұл көкөніс өнімдерінің шығынын азайтып, сақтау мерзімін ұзартады.
Қазіргі уақытта Ақмола облысында жалпы сақтау қуаты 104 мың тоннаны құрайтын 46 картоп-көкөніс қоймасы жұмыс істейді.
Сонымен қатар 2027 жылға Аршалы ауданында және Біржан сал ауданында тағы екі көкөніс қоймасын салу жоспарланған. Олардың жалпы қуаты 15 мың тоннаны құрайды.
