30.03.2026, 01:59
Абай облысында картоп егіс алқаптары ұлғайтылады
Өңір көктемгі дала жұмыстарына дайындықты күшейтуде
Өңірде ірі ауыл шаруашылығы кәсіпорындарын тарта отырып, картоп егіс алқаптарын ұлғайту бойынша шаралар қабылдануда. 2026 жылы облыста ауыл шаруашылығы дақылдарының жалпы егіс көлемі 789,3 мың гектарды құрайды, оның ішінде 6,6 мың гектары картопқа бөлінеді. Бұл туралы облыс әкімдігінің баспасөз қызметі хабарлады.
Ведомство мәліметінше, 5,2 мың гектар көкөніс және бақша дақылдарына, 299,2 мың гектар дәнді және дәнді-бұршақты дақылдарға, 138 мың гектар мал азықтық дақылдарға бөлінеді.
Сонымен қатар өңірде жүгері егісін ұлғайту және мал шаруашылығының дамуына байланысты жем-шөп базасын нығайту жұмыстары жалғасуда. Майлы дақылдар егіс көлемі өткен жыл деңгейінде сақталып, 340,3 мың гектарды құрайды.
Әкімдікте өңірдің тұқыммен толық қамтамасыз етілгені атап өтілді. Қазіргі уақытта 6,6 мың тонна элиталық тұқым сатып алынуда, сондай-ақ олардың сапасын тексеру жалғасуда. 2026 жылға арналған тыңайтқыш енгізу жоспары 82,9 мың тоннаны құрайды.
Егіс жұмыстарына 12,6 мыңнан астам ауыл шаруашылығы техникасы тартылатын болады. Жанар-жағармай материалдарына қажеттілік 29,6 мың тонна деп бағаланып отыр, оның 25,9 мың тоннасы бөлінген.
Көктемгі дала жұмыстары «Кең дала» бағдарламасы аясында қаржыландырылады: бұл мақсатқа 14 млрд теңге қарастырылған, оның ішінде 78 ауыл шаруашылығы өндірушісі 7,1 млрд теңгені игерген.
