20.07.2026, 00:48
Түркістан облысында 50 мың бас ірі қараға арналған бордақылау кешені іске қосылады
Жаңа өндірістік нысан мал бордақылау, ет өңдеу қуатын арттырып, қосылған құны жоғары өнім шығаруға мүмкіндік береді
Биылғы тамыз айында Түркістан облысында «Turkestan Agro.kz» ЖШС-нің бордақылау кешенін пайдалануға беру жоспарланып отыр. Кәсіпорын бір мезгілде 50 мың бас ірі қара малды ұстауға есептелген және Қазақстанның агроөнеркәсіптік кешені тарихындағы ең ірі жобалардың біріне айналады. Бұл туралы ҚР Ауыл шаруашылығы министрлігі хабарлады.
Жоба Солтүстік Қазақстан облысының тәжірибесін тарату бағдарламасы аясында жүзеге асырылуда. Мемлекеттік қолдау бордақылау алаңын салуға және заманауи суару жүйелерін енгізуге бағытталған. Қазіргі уақытта кешен үшін өнімділігі жоғары 30 мың бас ірі қара сатып алынған.
Өндірістік жүйе австралиялық заманауи «торлы» технология негізінде ұйымдастырылған. Бұл тәсіл малды тиімді орналастыруға, жануарлардың күйзелісін азайтуға және өнімділігін арттыруға мүмкіндік береді. Азықтандыру, күтіп-бағу және ветеринариялық қызмет көрсету толық автоматтандырылған. Барлық өндірістік үдерістер халықаралық биологиялық қауіпсіздік талаптарына сәйкес ұйымдастырылған.
Жоба аясында жеке жем-шөп базасын қалыптастыруға ерекше көңіл бөлінген. 7 мың гектар алқапта жаңбырлатып суару жүйелері енгізілуде. Қазіргі уақытта 28 жаңбырлатқыш қондырғы орнатылған. Кәсіпорында тәулігіне 500 тоннаға дейін жем-шөп дайындалады.
Кешен аумағында сағатына 20 тонна түйіршіктелген жем өндіретін құрама жем зауыты жұмыс істейді. Болашақта жылына 1 млн тоннаға дейін жем өндіретін тағы бір зауыт салу жоспарланған.
Кәсіпорын өнімі қазірдің өзінде Қазақстанның ішкі нарығына жеткізіліп, Өзбекстан мен Тәжікстанға экспортталуда.
Жобаның келесі кезеңінде ет өңдеу кешенін салу жоспарланған. Оның қуаттылығы бір ауысымда 1,5 мың бас ірі қара мен 5 мың бас ұсақ малды өңдеуге жетеді. Кәсіпорын шикізатты терең өңдеуге және қосылған құны жоғары өнім шығаруға маманданатын болады.
Дайын өнім ішкі нарыққа да, шетелге де жеткізіледі. Экспорттың негізгі бағыттары ретінде Қытай мен Түркия қарастырылып отыр.
Ауыл шаруашылығы министрі Айдарбек Сапаров Түркістан облысына жұмыс сапары барысында саланың алдында тұрған міндет тек мал басын көбейту ғана емес, толық циклді заманауи әрі бәсекеге қабілетті ет шаруашылығы жүйесін қалыптастыру екенін атап өтті.
Оның айтуынша, елімізде инвестициялық жобалар жүйелі түрде жүзеге асырылып, жем-шөп базасы кеңейтіліп, заманауи технологиялар енгізіліп, асыл тұқымды мал шаруашылығы дамытылып, өңдеу қуаттары ұлғайтылуда. Министр Президенттің қолдауымен мал шаруашылығы отандық агроөнеркәсіптік кешеннің негізгі өсу бағыттарының біріне айналып отырғанын және мемлекет инвестиция тарту мен саланы одан әрі дамыту үшін жағдай жасауды жалғастыратынын айтты.
