15.07.2026, 00:17
Жарты жылда «ҚазАгроҚаржы» ауыл шаруашылығы техникасын сатып алуға 250,5 млрд теңге көлемінде қаржыландыру бөлді
Қаржыландырудың ең жоғары көлемі Солтүстік Қазақстан, Қостанай және Ақмола облыстарына тиесілі болды
«ҚазАгроҚаржы» АҚ 2026 жылдың қаңтар–маусым айларындағы жұмыс қорытындыларын шығарды. Алты ай ішінде қазақстандық аграршылар 250,5 млрд теңге сомасына ауыл шаруашылығы техникасын лизингке рәсімдеді. Бұл өткен жылдың осы кезеңімен салыстырғанда шамамен екі есе жоғары көрсеткіш.
Компанияның мәліметінше, 2025 жылдың бірінші жартыжылдығында жасалған лизинг шарттарының көлемі 126,6 млрд теңгені құраған. Осылайша, 2026 жылы «ҚазАгроҚаржы» жоспарлы көрсеткіштерге қол жеткізіп қана қоймай, оларды айтарлықтай асыра орындады.
Қаржыландырылған өтінімдердің ең үлкен көлемі үш өңірге тиесілі болды. Көш басында 53,6 млрд теңге көлеміндегі келісімшарттармен Солтүстік Қазақстан облысы тұр. Одан кейін Қостанай облысы – 44,3 млрд теңге және Ақмола облысы – 40,1 млрд теңге. Бұл өңірлердің жоғары көрсеткіштері олардың астық өндірісіндегі жетекші рөлімен және техника паркін белсенді жаңартуымен байланысты.
Техниканың негізгі бөлігі – жалпы құны 209,1 млрд теңгені құрайтын 6 381 бірлік – жылдық 5% мөлшерлемемен ұсынылатын жеңілдетілген лизинг бағдарламасы арқылы сатып алынған. Бұл ауыл шаруашылығы тауарын өндірушілер арасында ең сұранысқа ие бағдарлама болып отыр.
Сонымен қатар қаржыландыру басқа бағдарламалар аясында да жүзеге асырылды. Жылдық 12,6% мөлшерлемемен ұсынылатын «Агролизинг» бағдарламасы бойынша 34,6 млрд теңгеге 1 189 техника бірлігі рәсімделді. «Қазақстанда жасалған» бағдарламасы бойынша жылдық 6% мөлшерлемемен 4,4 млрд теңгеге 146 техника бірлігі қаржыландырылды. «6% жеңілдетілген лизинг» бағдарламасы аясында аграршылар 2,4 млрд теңгеге 51 техника бірлігін алды. Ал «Өз жемшөбің» бағдарламасы бойынша жылдық 6% мөлшерлемемен жалпы құны 16,2 млн теңге болатын 2 техника бірлігі берілді.
«ҚазАгроҚаржы» АҚ Басқарма төрағасының орынбасары Еркебұлан Жұмжаевтың айтуынша, лизинг көлемінің артуы бүкіл ел бойынша ауыл шаруашылығы өндірушілерімен жүргізілген жүйелі жұмыстың нәтижесі. Оның сөзінше, жеңілдетілген бағдарламалар аграршылардың техника паркін уақытылы жаңартуына мүмкіндік береді, ал компания екінші жартыжылдықта қаржыландыру көлемін одан әрі арттыруды жоспарлап отыр.
Алғашқы алты айдың қорытындысы бойынша «ҚазАгроҚаржының» қызметтерін 3 931 ауыл шаруашылығы тауарын өндіруші пайдаланды. Олардың қатарында шағын шаруа қожалықтары да, ірі агрокәсіпорындар да бар.
Компания бағдарламаларына деген сұраныс жоғары деңгейде сақталуда. Жыл басынан бері жалпы сомасы 311,5 млрд теңгеге жуық 9 мың техника бірлігін сатып алуға өтінімдер түсті. Сонымен қатар 35,9 млрд теңгеге бағаланған тағы 859 техника бірлігі бойынша қаржыландыру мақұлданып, келісімшарттарды рәсімдеу күтілуде. Бұдан бөлек, 25 млрд теңге сомасындағы өтінімдер қаралу үстінде.
