22.09.2026, 00:22
ҚТЖ астықтың экспорттық тасымалына қолданылатын жеңілдіктер туралы
Қаңтар–тамыз айларында ҚТЖ желісі бойынша астықтың экспорттық тасымалы 14%-ға өсіп, 7,2 млн тоннаға жетті
Қазақстандық астықты экспортқа тасымалдау кезінде бірқатар бағыттар бойынша төмендетілген тарифтік шарттар қолданылуын жалғастыруда. Қолданыстағы жеңілдіктер туралы ақпарат Қостанай мен Көкшетауда өткен ҚТЖ Астық штабының көшпелі отырыстарында ұсынылды.
Өзбекстан аумағы арқылы астық тасымалдау кезінде Келес – Галаба учаскесінде тасымал көлеміне байланысты 30%-дан 50%-ға дейін жеңілдік беріледі. Келес – Ходжадавлет бағыты бойынша 60%, ал Қарақалпақстан – Галаба учаскесінде 40% жеңілдік қолданылады. Түрікменстан аумағы арқылы тасымалдау кезінде таңдалған бағытқа байланысты тарифтерді 30–50%-ға төмендету қарастырылған.
Ресей аумағындағы Қиғаш – Самур бағытында 40% жеңілдік қолданылады. Калининград темір жолының қатысуымен жүзеге асырылатын тасымалдар үшін тариф 20%-ға төмендетілген.
ҚТЖ астық тасымалы бойынша да мәліметтер ұсынды. 2026 жылғы қаңтар–тамыз айларында компанияның теміржол желісі арқылы 9,3 млн тонна астық тасымалданды, бұл өткен жылдың сәйкес кезеңіндегі көрсеткіштен 13%-ға жоғары. Экспорттық тасымалдар 14%-ға өсіп, 7,2 млн тоннаға жетті, ал ел ішіндегі тасымал көлемі 8%-ға артып, 2,1 млн тоннаны құрады.
Тамыз айында астық тасымалының рекордтық айлық көрсеткіші тіркелді — 1,2 млн тонна. Бұл 2025 жылғы тамызбен салыстырғанда 35%-ға көп.
Жаңа өнім астығын тиеу көлемі бойынша Ақмола облысы көш бастап тұр. Тамыз айының басынан бері өңірде шамамен 520 мың тонна астық тиелді, бұл осы кезеңдегі Қазақстан бойынша жалпы тиеу көлемінің 31%-ын құрайды — 1,7 млн тонна.
Ақмола облысынан сыртқы нарықтарға 409 мың тонна астық жөнелтілді, тағы 111 мың тонна ел ішінде тасымалданды. Осылайша, өңірден тиелген астықтың жалпы көлемінің шамамен 79%-ы экспортқа бағытталады. Астық маусымы басталғалы облыстан шамамен 80 маршруттық пойыз жөнелтілді.
Қостанай облысы да Қазақстанның ірі астықты өңірлерінің бірі болып қала береді. Сегіз айда мұнда 1,8 млн тоннадан астам астық тиелді. Оның ішінде 1,4 млн тоннадан астамы экспортқа жөнелтілсе, 405,5 мың тоннасы республика ішіндегі қатынаста тасымалданды.
Қостанай облысының астығы үшін ең ірі экспорттық бағыт Өзбекстан болып қала береді. Сегіз айда бұл елге 606,4 мың тонна астық жөнелтілді, бұл өңірден экспортталған астықтың жалпы көлемінің 43%-ын құрайды. Ресейге 169,6 мың тонна, Ауғанстанға 135,6 мың тонна, Тәжікстанға 133,5 мың тонна, Қытайға 84,1 мың тонна астық тасымалданды.
Сонымен қатар Қостанай облысының астығы Әзербайжан, Қырғызстан, Беларусь, Латвия, Эстония және Түрікменстанға жеткізілді.
ҚТЖ желісінде тасымалды қамтамасыз ету үшін шамамен 16 мың астық таситын вагон, 17,8 мыңнан астам жабық вагон және 1 710 локомотив пайдаланылады. Жыл басынан бері компанияның локомотив паркі 169 локомотивпен толықты.
Қыркүйек айында теміржол желісінің жекелеген учаскелерінде жөндеу жұмыстары жалғасуда. Бұл ретте бағыттардың басым бөлігінде өткізу қабілеті бұрынғы деңгейде сақталуда немесе артып келеді.
