16.07.2026, 02:02
Айдарбек Сапаров мал шаруашылығын АӨК дамуының негізгі қозғаушы күштерінің бірі деп атады
Батыс Қазақстан облысына жұмыс сапары барысында министр егін жинау науқанына дайындық пен аграрлық сектордағы инвестициялық жобалардың жүзеге асырылуын бағалады
Ауыл шаруашылығы министрі Айдарбек Сапаров Батыс Қазақстан облысына жұмыс сапары аясында өңірдің ауыл шаруашылығы тауарын өндірушілерімен кездесті, бірқатар инвестициялық нысандарды аралап, аграршылардың алдағы егін жинау науқанына дайындығын бағалады.
Аграрлық қауымдастық өкілдерімен кездесу барысында министр 2026 жылы сала алдында ауқымды міндеттер тұрғанын атап өтті. Оның айтуынша, ауыл шаруашылығының өсімі 5,9% деңгейінде қамтамасыз етіледі, оған қажетті барлық ресурстар мен мүмкіндіктер бар. Бұл Мемлекет басшысы қойған ауыл шаруашылығының жалпы өнім көлемін екі есеге арттыру жөніндегі стратегиялық міндетті кезең-кезеңімен орындауға мүмкіндік береді. Сондай-ақ Айдарбек Сапаров ауыл шаруашылығы тауарын өндірушілерді мемлекеттік қолдаудың қолданыстағы шаралары туралы айтты.
Министрліктің мәліметінше, көктемгі егіс жұмыстарын жеңілдетілген қаржыландыру бағдарламасын қазірдің өзінде 5,5 мыңнан астам отандық ауыл шаруашылығы тауарын өндіруші пайдаланды. Бөлінген қаржының жалпы көлемі 618 млрд теңгені құрады.
Саланы одан әрі дамыту мақсатында Үкімет мал шаруашылығын дамытудың кешенді жоспарын бекітті. Құжат өндірістік тізбектің барлық кезеңдерінде қолжетімді жеңілдетілген қаржыландыруды қамтамасыз етуді көздейді. Қазіргі уақытта аграршылар үшін «Игілік» және «Береке» жеңілдетілген несие бағдарламалары жұмыс істейді, ал жайылымдық мал шаруашылығын дамыту үшін «Жайлау» бағдарламасы іске асырылуда.
Айдарбек Сапаров саланың қосымша даму резервтерінің бірі ірі өсімдік шаруашылығы кәсіпорындарын мал шаруашылығын дамытуға кеңінен тарту екенін атап өтіп, осы бағыттағы жұмысты жандандыруға шақырды.
Кездесуге қатысушылар мемлекеттік қолдау шараларын оң бағалап, жеңілдетілген қаржыландырудың қолжетімділігі артқанын, ауыл шаруашылығы техникасының жаңартылып жатқанын және инвестициялық жобаларды іске асыруға қолайлы жағдай жасалғанын айтты. Олардың пікірінше, биыл мал шаруашылығын дамытуға ерекше назар аударылып, жаңа несие бағдарламаларының іске қосылуы өндірісті кеңейтуге және ауылдық жерлерде қосымша жұмыс орындарын ашуға мүмкіндік береді.
Жұмыс сапары барысында министр жобалық қуаты 12 мың тонна болатын «Орал Агро» ЖК-нің салынып жатқан көкөніс қоймасын аралады. Жобаның құны 2,8 млрд теңгеден асады. Нысанды пайдалануға беру ағымдағы жылдың қыркүйегіне жоспарланған.
Сондай-ақ Айдарбек Сапаров 2025 жылы пайдалануға берілген «КТК-888» ЖШС сүт-тауар фермасының жұмысымен танысты. Кәсіпорынға Ақтөбе облысы мен Даниядан 400-ден астам ірі қара әкелінген, заманауи сауу залы жұмыс істейді, сүт өңдеу цехының құрылысы жалғасуда. Жыл соңына дейін жоғары өнімді мал басын 1 мың басқа дейін жеткізу жоспарланып отыр.
«Атамұра» шаруа қожалығында министрге өндірістік процестерді тиімді басқаруға арналған Cropwise Operations цифрлық платформасы таныстырылды. Шаруашылықта күздік дақылдарды жинау жұмыстары басталып, орташа өнімділік гектарына 49 центнерді құрап отыр.
Жұмыс сапарының қорытындысы бойынша Айдарбек Сапаров егін жинау науқанына сапалы дайындықты қамтамасыз етуді, фитосанитариялық және ветеринариялық қауіпсіздікке бақылауды күшейтуді, сондай-ақ агроөнеркәсіптік кешеннің тиімділігі мен бәсекеге қабілеттілігін арттыруға бағытталған инвестициялық жобаларды іске асыруды жалғастыруды тапсырды.
Министрдің айтуынша, бүгінде аграрлық сектор алдында өндіріс көлемін ұлғайту ғана емес, сонымен қатар заманауи, жоғары технологиялы және экспортқа бағдарланған агроөнеркәсіптік кешен қалыптастыру міндеті тұр. Мемлекеттік қолдау шаралары мен инвестициялық жобалар дәл осы мақсаттарға қол жеткізуге бағытталған.
