05.10.2026, 23:51
Қазақстанға 84,5 тонна залалданған өнімді әкелуге жол берілмеді
«Тасқала» және «Шаған» бекеттеріндегі фитосанитариялық бақылау кезінде мақсары, зығыр тұқымдары мен арпа партияларынан карантиндік объект анықталды
Батыс Қазақстан облысында ҚР Ауыл шаруашылығы министрлігі Агроөнеркәсіптік кешендегі мемлекеттік инспекция комитетінің өсімдіктер карантині жөніндегі мемлекеттік инспекторлары ел аумағына 84,5 тонна карантинге жатқызылған өнімнің әкелінуіне жол бермеді.
Зерттеу нәтижелері бойынша өнім партияларынан қауіпті карантиндік объект — жатаған у кекіре анықталды.
Заң бұзушылықтар «Тасқала» және «Шаған» бекеттерінде фитосанитариялық бақылау жүргізу барысында анықталды.
«Тасқала» фитосанитариялық бақылау бекетінде мамандар азық-түліктік мақсары тұқымдары мен арпа партияларын тексерді. Тексеру барысында инспекторлар өнім үлгілерін алып, оларды фитосанитариялық сараптамаға жіберді.
«Шаған» бақылау бекетінде азық-түліктік зығыр тұқымдарының партиясы тексерілді. Алынған үлгілер де зертханалық зерттеуге жіберілді.
Сараптаманы «Фитосанитария» шаруашылық жүргізу құқығындағы республикалық мемлекеттік кәсіпорны филиалының Батыс Қазақстан облыстық карантиндік зертханасы жүргізді.
Зертхана қорытындыларына сәйкес, зерттелген барлық үлгілерден жатаған у кекіренің (Acroptilon repens L.) тұқымдары анықталды. Бұл түр карантиндік объектілер қатарына жатады.
Қазақстан Республикасының заңнамасына сәйкес залалданған өнім партияларын ел аумағына әкелуге рұқсат берілген жоқ.
Карантинге жатқызылған өнімнің барлық 84,5 тоннасы экспорттаушы елге қайтарылды.
Ауыл шаруашылығы министрлігі фитосанитариялық қауіпсіздікті қамтамасыз ету және ауыл шаруашылығы өндірісіне қауіп төндіруі мүмкін карантинге жатқызылған өнімдердің Қазақстан аумағына әкелінуіне жол бермеу бойынша жұмысты жалғастыруда.
