31.05.2026, 23:53
Қазақстанға 200 тоннадан астам залалданған астықтың әкелінуіне жол берілмеді
Ресейден жеткізілген бидай мен арпа партияларынан қауіпті карантиндік нысандар анықталды
Өсімдіктер карантині жөніндегі мемлекеттік инспекторлар ҚР АШМ АӨК-тегі МИК аумақтық инспекцияларының фитосанитариялық бақылауы барысында ел аумағына залалданған карантиндік өнімнің ірі партияларының әкелінуінің алдын алды.
Ақтөбе, Батыс Қазақстан және Қостанай облыстарында Ресей Федерациясынан өсімдіктер карантині мен фитосанитариялық қауіпсіздік талаптарын бұза отырып жеткізілген 200 тоннадан астам азық-түлік астығы – бидай мен арпа ұсталды.
Тексеру барысында өнім партияларынан қауіпті карантиндік нысандар, оның ішінде үш тілімді ойраншөп, жатаған кекіре (қызғылт) және арамсояу анықталды.
Қабылданған шаралардың нәтижесінде ұсталған жүктің 128 тоннадан астам бөлігі экспорттаушы елге кері қайтарылды. Карантиндік өнім иелеріне қатысты әкімшілік материалдар рәсімделді.
Жиналған материалдар Қазақстан Республикасының қолданыстағы заңнамасына сәйкес кінәлі тұлғаларды жауапкершілікке тарту мәселесін қарау үшін сот органдарына жолданды.
Министрлік фитосанитариялық қауіпсіздікті қамтамасыз ету және ауыл шаруашылығы мен ел экожүйесіне қауіп төндіретін өнімдердің әкелінуіне жол бермеу бағытындағы жұмыстарды жалғастыруда.
