Қазақстан мал шаруашылығы үшін жеңілдетілген кредиттеу бағдарламаларын кеңейтті

Қазақстанда мал шаруашылығы саласын жеңілдетілген қаржыландырудың жаңа бағдарламалары іске қосылды. Саланы дамытудың кешенді жоспары аясында жайылымдық мал шаруашылығын дамытуға және елдің азық-түлік қауіпсіздігін нығайтуға бағытталған «Жайлау» атты жаңа кредиттік өнім енгізілді.

«Жайлау» бағдарламасы ірі қара мал саны 300 бастан немесе ұсақ мал саны 1000 бастан асатын жаңа мал шаруашылығы кәсіпорындарын құруды қаржыландыруды көздейді. Бағдарламаны іске асыру өндірістік инфрақұрылымды нығайтуға, мал шаруашылығы өнімдерінің өндіріс көлемін ұлғайтуға және ауылдық жерлерде қосымша жұмыс орындарын ашуға мүмкіндік береді.

Бағдарлама шарттарына сәйкес сыйақы мөлшерлемесі жылдық 6%-дан аспайды, кредит мерзімі – 10 жылға дейін. Қаржыландыру көлемі ірі қара мал өсіру жобалары үшін 350 млн теңгеге дейін, ал ұсақ мал өсіру жобалары үшін 200 млн теңгеге дейін қарастырылған.

Сонымен қатар «Игілік», «Береке» және «Айналым қаражатын толықтыру» бағдарламалары бойынша жеңілдетілген қаржыландыру бағыттары кеңейтілді.

Енді мемлекеттік қолдау тек ірі қара мал шаруашылығына ғана емес, сондай-ақ қой шаруашылығы, жылқы шаруашылығы, түйе шаруашылығы, омарташылық, шошқа шаруашылығы және марал шаруашылығына да таралады.

«Игілік» және «Береке» бағдарламалары жоғары өнімді асыл тұқымды мал сатып алуды қаржыландыру арқылы ауыл шаруашылығы тауарын өндірушілерді қолдауға бағытталған. Бұл шаралар ауыл шаруашылығы жануарларының санын көбейтуге, табындардың генетикалық әлеуетін арттыруға және мал шаруашылығы өнімдерінің өнімділігі мен тиімділігін жақсартуға мүмкіндік береді.

«Игілік» бағдарламасы бойынша 100 бастан ірі қара немесе 500 бастан ұсақ малдың импорттық мал басын, сондай-ақ жылқы, түйе, шошқа, ара және маралдың импорттық немесе отандық асыл тұқымды малын сатып алу қаржыландырылады. Жылдық сыйақы мөлшерлемесі – 6%-дан аспайды, кредит мерзімі – 7 жылға дейін.

«Береке» бағдарламасы 500 бастан ірі қара немесе 1000 бастан ұсақ малдың импорттық мал басын сатып алуды қаржыландыруды қарастырады. Қаржыландыру жылдық 6%-дан аспайтын мөлшерлемемен 7 жылға дейінгі мерзімге беріледі.

Қаржыландыру бағыты мен сатып алынатын мал түріне байланысты негізгі қарыз бен сыйақыны өтеу бойынша 12 айдан 30 айға дейінгі жеңілдік кезеңі қарастырылған.

«Айналым қаражатын толықтыру» бағыты бойынша жем-шөп пен жемдік қоспаларды, жанар-жағармай материалдарын, ветеринариялық препараттарды, жем дайындау және тарату техникасы мен жабдықтарына арналған қосалқы бөлшектерді сатып алуға, сондай-ақ қызметкерлердің еңбекақысын төлеуге қаржы бөлінеді.

Бұл бағдарлама бойынша жылдық сыйақы мөлшерлемесі 5%-дан аспайды, ал кредит мерзімі 12 айға дейін.

Сонымен қатар өңірлік әлеуметтік-кәсіпкерлік корпорацияларды тарту есебінен қаржыландыру арналары кеңейтілді.

Жеңілдетілген кредиттеу бағдарламаларына қатысу шарттары туралы толық ақпаратты ауыл шаруашылығы тауарын өндірушілер «Аграрлық несие корпорациясы» АҚ-ның облыстық филиалдарынан және облыс әкімдіктері жанындағы өңірлік ӘКК-ден ала алады.