05.08.2026, 01:14
Қазақстанның агроөнеркәсіптік өнімдерінің экспорты 2025 жылдың қорытындысы бойынша 7 млрд АҚШ долларына жетті
Экспорт географиясының кеңеюі мен қайта өңдеу саласының дамуы саланың экспорттық әлеуетінің өсуіне ықпал етті
Қазақстан агроөнеркәсіптік кешен өнімдерін сыртқы нарықтарға жеткізу географиясын кеңейтуді жалғастыруда. Бұл туралы Үкімет отырысында Ауыл шаруашылығы вице-министрі Азат Сұлтанов мәлімдеді.
Оның айтуынша, өндіріс пен қайта өңдеу көлемінің артуы экспортты одан әрі ұлғайтуға мүмкіндік беруде. 2025 жылдың қорытындысы бойынша АӨК өнімдерінің экспорты 37%-ға өсіп, 7 млрд АҚШ долларына жетті. Оның жартысынан астамын қайта өңделген өнімдер құрады.
Айтарлықтай өсім астық секторында да тіркелді. 2024/2025 маркетингтік жылы астық пен ұнның астық баламасындағы экспорты рекордтық 15,3 млн тоннаға жетті.
Экспортты ынталандыру шараларының арқасында қазақстандық өнімдер Марокко, Алжир, Біріккен Араб Әмірліктері, Вьетнам және Еуропаның бірқатар елдерінің нарықтарына шықты. Сонымен қатар Әзербайжанға, Грузияға және Түркияға жеткізілімдер қайта жанданды.
Май-тоңмай саласында да оң динамика сақталуда. 2025 жылдың қорытындысы бойынша күнбағыс майының экспорты 41%-ға, ал тазартылған күнбағыс майының экспорты 2,1 есеге өсті.
