27.06.2025, 19:57
Fufeng Group Жамбыл облысында жүгеріні қайта өңдеуге 800 млн доллар инвестициялайды
Қазақстанда жүгеріні қайта өңдеу: 800 млн долларлық инвестиция және экспортқа бағыт
Қазақстан мен Қытай агроөнеркәсіптік саладағы ынтымақтастығын нығайтуда. Ауыл шаруашылығы министрі Айдарбек Сапаров пен қытайлық Fufeng Group компаниясының өкілдері арасында өткен ресми кездесу барысында Жамбыл облысында ауқымды агроөндірістік жобаны іске асыру жөнінде инвестициялық келісімге қол қойылды.
Аталған бастамаға екі елдің жоғары басшылығы қолдау білдірді — Қытай Халық Республикасының Төрағасы Си Цзиньпиннің Қазақстанға сапары аясында тараптар экономикалық әріптестікті тереңдетуге ниетті екендерін растады. Ауыл шаруашылығы министрлігі бұл келісімді екіжақты инвестициялық ынтымақтастықтың маңызды кезеңі ретінде бағалап отыр. Қазақстан тарапы жобаны іске асырудың барлық кезеңінде жан-жақты қолдау көрсетуге дайын екендігін мәлімдеді.
Жобаны Fufeng Group компаниясының Қазақстандағы еншілес кәсіпорны — «Shengtai Biotech» ЖШС жүзеге асырады. Бірінші кезеңде шамамен 350 млн АҚШ доллары көлемінде инвестиция тартыла отырып, жүгеріні терең қайта өңдеу зауыты салынады. Жобаның жалпы құны 800 млн АҚШ долларына бағалануда.
Вертикалды интеграцияланған өндірістік кластер құрамына крахмал өндіретін зауыт, үш биоферментациялық кәсіпорын, көмірмен жұмыс істейтін жылу электр станциясы және ағынды суларды тазарту станциясы кіреді. Алдағы уақытта тұз қышқылы мен сұйық аммиак сияқты химиялық компоненттерді шығаратын өндіріс желілері іске қосылады.
Кәсіпорын аминқышқылдары мен жемшөп қоспаларын (лизин, глутамин, глутамин қышқылы, лейцин, треонин және т.б.) өндіруді көздеп отыр. Негізгі экспорт бағыттары — Еуропа, Солтүстік Африка және Таяу Шығыс нарықтары болмақ.
Жоспарға сәйкес, өндірістік қуаттарды іске қосу 2029 жылға белгіленген. 2032 жылға қарай кәсіпорын жылына 5 млн тоннаға дейін жүгері өңдеуді мақсат етіп отыр. Жобаны іске асыруға дайындық 2025 жылы басталады — сол жылы инвестор 500 мың тонна жүгері сатып алуды жоспарлап отыр. 2026 жылы жергілікті ауыл шаруашылығы өндірушілерімен форвардтық келісімшарттар жасалмақ.
Кешен құрылысы аймақтың агроөнеркәсіптік әлеуетін арттырып қана қоймай, отандық жүгеріге тұрақты сұраныс қалыптастырып, қосылған құны жоғары өнімдерді өндіру және экспорттау мүмкіндіктерін кеңейтеді.
