Ақмола облысында астықты терең өңдеу зауыты салынады

Президент Қасым-Жомарт Тоқаевтың агроөнеркәсіптік кешенді дамыту жөніндегі тапсырмаларын іске асыру аясында Қазақстан Үкіметі Ауыл шаруашылығы министрлігі мен «Азия Алтын Дән» ЖШС арасында инвестициялық келісімге қол қоюды мақұлдады. Құжат Ақмола облысында астықты терең өңдеу зауытын салу жобасын жүзеге асыруды көздейді. Тиісті қаулыға Премьер-министр Олжас Бектенов қол қойды.

Кәсіпорын Aqmola индустриялық аймағында 500 гектар аумақта салынады. Жоба астықты биотехнологиялық және қалдықсыз өңдеуге бағытталған заманауи жоғары технологиялық кешен құруды көздейді. Ауқымы бойынша ол АӨК өңдеу секторындағы ірі нысандардың біріне айналады.

Жалпы инвестиция көлемі 300 млрд теңгені құрайды. Кәсіпорынның өндірістік қуаты жылына 6 млн тоннаға дейін өнім өндіруге жетеді.

Жобаның экономикалық тиімділігі кешенді болады деп күтілуде. Астықты толық цикл бойынша өңдеу ұйымдастырылып, жоғары қосылған құны бар өнімдер — ұн-жарма өнімдерінен бастап ауыл шаруашылығы жануарларына арналған дайын жемге дейін шығарылады. Бұл экспортты әртараптандыруға, жергілікті шикізатты тиімді пайдалануға және импортқа тәуелділікті азайтуға мүмкіндік береді.

Жобаны іске асыру өңірдің әлеуметтік-экономикалық дамуына елеулі әсер етеді. Кәсіпорында шамамен 800 жаңа жұмыс орны ашылады. Инвестор жыл сайын 40 адамға дейін биоинженерия саласында мамандар даярлау міндетін алады. Кадрлар даярлау үздіксіз оқыту жүйесі арқылы, соның ішінде шетелдік тағылымдамалар мен халықаралық алмасу бағдарламалары негізінде жүзеге асырылады.

Сонымен қатар, зауыт базасында заманауи ғылыми-технологиялық зертхана құру жоспарлануда. Инвестор индустриялық аймақтың сыртқы инженерлік-коммуникациялық инфрақұрылымын дамытуға да қаражат бөледі.

Болашақта зауыт іске қосылғаннан кейін Астана – Қарағанды автожолында жолайрықпен бірге путепровод, сондай-ақ индустриялық аймаққа теміржол магистралі арқылы шығатын автожол салу қарастырылған.

Инвестор өңірдің әлеуметтік инфрақұрылымын дамытуға да қатысуды жоспарлап отыр. Жоба толық іске қосылғаннан кейін жыл сайын білім беру, мәдениет, бұқаралық спорт, жастар саясаты және денсаулық сақтау салаларындағы әлеуметтік жобаларға қаржы бөлінеді.

Қосымша ретінде, кәсіпорын іске қосылғаннан кейін екі жыл ішінде жүзу бассейні мен жекпе-жек залдары бар көпфункционалды спорттық-сауықтыру кешені салынады. Кешен халық үшін қолжетімді болады.

Жалпы алғанда, жобаны іске асыру елдің азық-түлік және экономикалық қауіпсіздігін арттырып, экспорттағы өңделген өнім үлесін көбейтіп, Қазақстанның жоғары технологиялық агроөнеркәсіптік өнім жеткізуші ретіндегі позициясын нығайтады.