21.04.2026, 00:46
Астанада шегірткемен күрестің жаңа тәсілдері қаралды
Егінді қорғау тиімділігін арттыру шаралары талқыланды
Астанада Қазақстан Республикасы Ауыл шаруашылығы министрлігі Агроөнеркәсіптік кешендегі мемлекеттік инспекция комитетінің және БҰҰ-ның Азық-түлік және ауыл шаруашылығы ұйымының (ФАО) өкілдерінің жұмыс кездесуі өтті. Кездесу барысында тараптар шегіртке зиянкестеріне қарсы іс-қимыл шараларын талқылады.
Қатысушылар шегірткенің таралуының қазіргі жағдайын қарастырып, мониторингтің ғылыми әдістерін енгізуге және ауыл шаруашылығына төнетін трансшекаралық қауіптерге қарсы күресте халықаралық тәжірибені қолдануға ерекше назар аударды.
КГИ АӨК төрағасы Сәкен Қаныбеков зиянкестердің санын тиімді шектеу тек жүйелі жұмыс арқылы мүмкін екенін атап өтті. Бұл тұрақты мониторингті, жедел әрекет етуді және ұлттық әрі өңірлік деңгейде үйлестірілген іс-қимылды қамтиды.
ФАО-ның аға сарапшысы Александр Лачининский шегіртке санының күрт көбеюі табиғи биологиялық құбылыс екенін, оның климаттық жағдайларға, соның ішінде құрғақшылық пен мол жауын-шашын кезеңдерінің алмасуына тікелей байланысты екенін айтты. Оның сөзінше, шегіртке трансшекаралық зиянкеске жатады, сондықтан оның популяциясын тиімді басқару тек халықаралық тығыз ынтымақтастық пен ғылыми негізделген тәсілдер арқылы мүмкін.
Кездесу барысында өсімдіктерді қорғау құралдарын қолдану қауіпсіздігі, ресурстарды пайдалану ашықтығы және жүргізіліп жатқан жұмыстардың ауқымы мәселелері де талқыланды.
Сондай-ақ спутниктік мониторинг пен ұшқышсыз ұшу аппараттарын пайдалану сияқты заманауи цифрлық шешімдердің рөлі және трансшекаралық зиянкестермен күрестегі халықаралық ынтымақтастықтың маңызы атап өтілді.
Сарапшылар негізгі міндет — ғылыми тәсілдер, заманауи технологиялар және барлық деңгейдегі үйлестірілген әрекеттер арқылы ауыл шаруашылығына келетін зиянды барынша азайту екенін айтты.
Кездесу қорытындысы бойынша қатысушылар шегіртке шабуылын төтенше жағдай емес, жүйелі басқаруды қажет ететін табиғи циклдік процесс ретінде қарастыру қажет екенін атап өтті.
