Астық тасымалдау тарифтері 2,6 есеге дейін өсуі мүмкін

«Қазақстан темір жолы» ұлттық компаниясы 2026–2030 жылдарға арналған магистральдық теміржол желісі қызметтеріне тарифтерді қайта қарау бойынша Табиғи монополияларды реттеу комитетіне өтінім жолдады.

Оператордың ұсынысына сәйкес, 2026 жылғы 1 маусымнан бастап бірқатар бағыттар бойынша тасымалдау құнын айтарлықтай арттыру жоспарлануда. Атап айтқанда, түсті кенді тасымалдау тарифтері 3,1 есеге, минералды тыңайтқыштар, химикаттар мен сода — 2,9 есеге, көмір — 2,7 есеге, астық — 2,6 есеге дейін өсуі мүмкін. Темір кенін тасымалдау 2,5 есеге, глинозем — 2,4 есеге, құрылыс материалдары мен ағаш жүктері — 2,1 есеге қымбаттауы ықтимал. Түсті және қара металдар үшін де 2,1 еселік өсім қарастырылған, ал қара металл сынықтары мен мақта талшығы үшін — 2 есеге дейін. Мұнай мен мұнай өнімдерін тасымалдау тарифтері 1,8 есеге, ал басқа жүктер мен бос жүріс үшін — 2,8 есеге дейін артуы мүмкін.

Сонымен қатар әлеуметтік маңызы бар жүктер үшін тарифтерді бұрынғы деңгейде сақтау жоспарланып отыр.

Тарифтерді көтеру бастамасы инфрақұрылымдық жобаларды жүзеге асыру үшін қосымша қаржы тарту қажеттілігімен түсіндіріледі. Әңгіме «Дарбаза – Мақтаарал», «Бақты – Аягөз», «Мойынты – Қызылжа» теміржол желілерін салу, «Алтынкөл – Жетіген» учаскесін жаңғырту, сондай-ақ «Қызылжар – Саксаульская», «Қандыағаш – Тобыл», «Ақсу-1 – Дегелен – Жаңа-Семей», «Шалқар – Бейнеу», «Никельтау – Әлімбет» бағыттарында автоблоктау жүйелерін енгізу, «Бейнеу – Маңғыстау» учаскесінде қабылдау-жөнелту жолдарын дамыту және бүкіл ел бойынша теміржол вокзалдарын жаңғырту жобалары туралы болып отыр.