Минсельхоз сиыр еті экспортына квота алу шарттарын қайта қарады

Қазақстанда сиыр етіне экспорттық квоталар алу шарттары қайта қаралды. Ауыл шаруашылығы министрлігі ірі қара мал етін ел аумағынан әкетуді реттейтін бұйрыққа өзгерістер енгізіп, өндірушілерге қойылатын талаптарды жеңілдетті.

Жаңартылған ережелерге сәйкес, экспорттық квота көлемі бордақылау алаңдарының қуатына қарай анықталады. Мысалы, 500 бас ІҚМ-ға арналған алаң үшін 100 тонна квота қарастырылған, 1 мың бас — 200 тонна, 2 мың — 400 тонна, 3 мың — 600 тонна, 4 мың — 800 тонна, 5 мың — 1 мың тонна. 10 мың басы бар шаруашылықтар үшін квота 2 мың тоннаны, 15 мың — 3 мың тоннаны, 20 мың — 4 мың тоннаны, ал 50 мың бас болған жағдайда 10 мың тоннаға дейін жетеді.

Квота алу құқығы өз шикізатын пайдаланатын ет өңдеу кәсіпорындарында, сондай-ақ қуаты кемінде 5 мың бас болатын және профильдік кәсіпорындармен қайта өңдеу шарттары негізінде жұмыс істейтін бордақылау алаңдарында сақталады.

Сонымен қатар, белгілі бір талаптарды орындаған жағдайда жеке және заңды тұлғалар, соның ішінде экспорттық компаниялар да экспортқа қатыса алады. Бұл талаптарға сыртқы экономикалық келісімшарттардың болуы, малды радиожиілікті белгілері бар сырғалармен (RFID) сәйкестендіру, сондай-ақ жасы кемінде 12 ай болатын, деректер базасында тіркелген және кемінде төрт ай бордақыланған ІҚМ болуы кіреді.

Қосымша талаптарға сәйкес, жеке бордақылау алаңының тіркеу нөмірі болуы тиіс: өз өңдеу кәсіпорны бар субъектілер үшін — кемінде 500 бас, ал өз кәсіпорны бар немесе келісімшарт негізінде үшінші тарап арқылы экспорттайтын алаңдар үшін — кемінде 5 мың бас.

Квота көлемі бөлу кезінде бір басқа орташа 200 килограмм сою салмағы негізінде есептеледі.

Сонымен қатар, бордақылау алаңдарына 18 айдан асқан дайын малды олардың жалпы қуатының 20%-ынан аспайтын көлемде қабылдауға рұқсат етіледі.

Еске сала кетейік, сиыр етіне экспорттық квоталар 2025 жылғы желтоқсанда ет өңдеу кәсіпорындарын жүктеу және ішкі нарықтағы бағаны тұрақтандыру мақсатында енгізілген болатын.