20.04.2026, 00:38
Қазақстанда агросақтандыруды субсидиялау бағдарламасы іске қосылды
Өсімдік шаруашылығы мен мал шаруашылығындағы тәуекелдерді азайту үшін мемлекет сақтандыру сыйақыларының 80%-ына дейін өтейді
«Аграрлық кредиттік корпорация» АҚ агроөнеркәсіптік кешендегі ерікті сақтандыру шарттары бойынша сақтандыру сыйақыларының бір бөлігін субсидиялауға өтінім қабылдаудың басталғанын хабарлады. Бағдарлама 2026 жылғы 16 сәуірден бастап іске қосылып, ауыл шаруашылығы тауар өндірушілерінің қаржылық тәуекелдерін төмендетуге бағытталған.
Қолдау тетігі өсімдік және мал шаруашылығындағы өндірістік тәуекелдерді сақтандыратын фермерлерге арналған. Бағдарма аясында мемлекет сақтандыру сыйақысының 80%-ына дейін өтейді, ал қалған 20%-ын аграрийлердің өздері төлейді. Корпорацияның мәліметінше, бұл модель сақтандырудың қолжетімділігін арттырып, оны салада кеңінен қолдануға ынталандырады.
Ауыл шаруашылығы өндірушілері жаздық дақылдарды топырақтың артық ылғалдануынан, көпжылдық екпелерді, оның ішінде алма бақтарын, сондай-ақ ауыл шаруашылығы жануарларын — ірі және ұсақ малды, жылқыларды, шошқаларды және құсты сақтандыра алады.
Өтінім беру мерзімі сақтандыру бағытына байланысты өзгереді. Жаздық дақылдарды артық ылғалдан сақтандыру бойынша құжаттар 2026 жылғы 30 маусымға дейін, ал көпжылдық екпелер бойынша 2026 жылғы 31 қазанға дейін қабылданады.
Өтінімдер Kezekte.kz платформасында орналастырылған АӨК сақтандырудың ақпараттық жүйесі арқылы онлайн түрде қабылданады. АКК мәліметінше, процестің цифрландырылуы мемлекеттік қолдау шараларына қолжетімділікті жеңілдетіп, сақтандыру шарттарын рәсімдеуді жеделдетеді.
Бағдарламаны іске асыру ауыл шаруашылығы өндірісінің тұрақтылығын арттырып, қолайсыз табиғи факторлардың шаруашылықтардың қаржылық нәтижелеріне әсерін азайтуға мүмкіндік береді деп күтілуде.
