29.04.2026, 00:24
Солтүстік Қазақстанда макарон өнімдерін өндіру және астықты өңдеу бойынша жаңа қуаттар пайда болады
Жобаларды іске асыру терең өңдеуді дамытуға және импортқа тәуелділікті азайтуға бағытталған
Түркиялық компаниямен Қостанай облысында макарон өнімдерін өндіретін зауытты іске қосу туралы келісімге қол жеткізілді. Сонымен қатар инвестор жылына шамамен 200 мың тонна бидай өңдейтін диірмен кешенін салуды жоспарлап отыр. Екі нысан да екі жыл бұрын пайдалануға берілген және бұршақ дақылдарын өңдеуге маманданған «Kaizen» ЖШС базасында жұмыс істейтін болады.
Өңір әкімдігінің мәліметінше, жобалар жүзеге асырылғаннан кейін кәсіпорынның жиынтық өндірістік қуаты жылына шамамен 400 мың тоннаны құрайды.
Қостанай облысының әкімі Құмар Ақсақаловтың айтуынша, жаңа өндірістік қуаттар ішкі нарықты отандық терең өңделген өніммен қамтамасыз етуге, макарон өнімдері импортына тәуелділікті азайтуға, сондай-ақ жақын шетел нарықтарына шығу арқылы экспорттық әлеуетті кеңейтуге бағытталған.
«Kaizen» ЖШС халықаралық түркиялық Arbel холдингінің инвестициялары есебінен құрылған. Кәсіпорында бұршақ, ноқат, жасыл және қызыл жасымық өңделеді. Өнім Қазақстанның ішкі нарығына да, сондай-ақ Түркия, Алжир, Ауғанстан және Еуропаның бірқатар елдеріне экспортталады. Өткен жылдың қорытындысы бойынша өндіріс пен экспорт көлемі 180 мың тоннаны құрады.
Әкімдікте сондай-ақ Қостанай облысы агроөнеркәсіптік кешен өнімдерін өңдеу бойынша жетекші орындардың бірін иеленетінін атап өтті. 2025 жылдың қорытындысы бойынша Қазақстанда өңделген АӨК өнімдерінің экспорты 8,1 млн тоннаға жетті, оның ішінде 2,2 млн тоннасы Қостанай облысына тиесілі. Осылайша, өңірдің үлесі жалпы экспорт құрылымында 27,2%-ды құрайды.