15.05.2026, 00:54
Ақтау портынан алғаш рет Иранға рапс майының партиясы экспортталды
Алғашқы 5 мың тонналық партияны тиеу 2,5 тәулікте жүзеге асырылды
Қазақстандық рапс майының алғашқы партиясы Ақтау порты арқылы Иранға жөнелтілді. Бұл туралы Майлы дақылдарды өңдеушілердің ұлттық қауымдастығы (НАПМК) хабарлады.
Қауымдастық мәліметінше, 4 сәуірде көлемі 5 мың тонна болатын алғашқы кеме жөнелтілді. Кемені толық тиеуге шамамен екі жарым тәулік кеткен.
Өнімді сатып алушы ретінде ирандық Kourosh Food Industry компаниясы шықты, ал жөнелтуші — НАПМК құрамына кіретін Қазақстандағы ірі май өңдеу зауыттарының бірі болды.
НАПМК басқарма төрағасы Ядыкар Ибрагимов Иран нарығы қазақстандық майлы өнімдерді экспорттау үшін үлкен әлеуетке ие екенін атап өтті. Оның айтуынша, Иран жыл сайын шамамен 3,5 млн тонна өсімдік майы мен шрот/күнжара импорттайды, оның ішінде 1,5 млн тоннасы тікелей өсімдік майларына тиесілі.
Сондай-ақ ол соңғы үш жылда қазақстандық кәсіпорындар Иранға 100 мың тоннадан астам майлы өнім экспорттағанын, оның 94%-ын шрот құрағанын хабарлады.
НАПМК мәліметінше, Ақтау портының инфрақұрылымы ай сайын Иранға 3–4 кеме жөнелтуге мүмкіндік береді. Жылдық көлемде бұл 150–200 мың тонна өсімдік майына тең. Болашақта Иранға майлар мен шрот экспортының көлемі жылына 500 мың тоннадан асуы мүмкін.
