04.06.2025, 10:59
KAZAKH INVEST пен Harvest Group жайылымдарды суармалы жерге айналдыру бойынша ірі жобаны іске қосады
Ірі агрожоба: 300 мың га жайылым суармалы алқапқа айналады
Қазақстанда агробизнестегі ірі инвестициялық бастамалардың бірі іске қосылды. Жоба Harvest Group SA (Швейцария) халықаралық тобына кіретін «Харвест Агро Холдинг» ЖШС базасында жүзеге асырылып, «KAZAKH INVEST» ұлттық компаниясының қолдауымен жүргізілуде. Басты мақсат — жерасты суларын және заманауи су үнемдеу технологияларын пайдалану арқылы суармалы егіншілікті кеңейту.
Бірінші кезеңде 150 мың гектар жайылым мен қыстақ жерлерін суармалы ауыл шаруашылығы алқаптарына айналдыру жоспарлануда. Кейін бұл көлем 300 мың гектарға дейін ұлғайтылуы мүмкін. Жоба Жамбыл, Алматы, Жетісу, Түркістан, Павлодар, Қызылорда және Шығыс Қазақстан облыстарын қамтиды.
Бастапқы кезеңдегі инвестиция көлемі шамамен 500 миллион АҚШ долларын құрайды. Негізгі екпін экспорттық және мал азығы ретінде құнды ауыл шаруашылығы дақылдарын, әсіресе жүгері мен сояны өсіруге қойылады.
Жоба еліміздегі 2030 жылға қарай суармалы жер көлемін 2,5 млн гектарға дейін ұлғайту жөніндегі ұлттық мақсатқа елеулі үлес қосады деп күтілуде. Нәтижесінде:
• 300 мың гектарға дейін жер ауыл шаруашылығы айналымына енгізіледі,
• топырақтың өнімділігі 4–6 есеге дейін артады,
• жерүсті су көздеріне түсетін жүктеме азаяды,
• агросекторда қосымша инвестицияларды ынталандыруға жол ашылады.
Инвестор компания басшылығы жобаның басты мақсаты — табиғи ресурстарды тиімді пайдалану мен заманауи агротехнологияларға негізделген тұрақты аграрлық инфрақұрылым құру екенін атап өтті.
Алдағы кезеңде Инвестициялық келісім жасалуы жоспарлануда. Бұл құжат тараптардың міндеттемелерін ресми түрде бекітіп, мемлекет тарапынан жобаны қолдауды қамтамасыз етеді.
