04.06.2026, 00:33
Қазақстан мен Гонконг агроөнім саудасын ұлғайтуды талқылады
Тараптар сауда, инвестиция және іскерлік байланыстарды дамытуға бағытталған бірлескен іс-шаралар жоспарын әзірлеуге келісті
Қазақстан мен Гонконг сауда және инвестиция салаларындағы ынтымақтастықты жандандыруға ниетті. Бұл мәселелер Қазақстан Республикасының Сауда және интеграция министрі Арман Шаққалиевтің, Гонконг арнайы әкімшілік ауданы әкімшілігінің басшысы Джон Лидің және Гонконг бизнес қауымдастығы өкілдерінің кездесуінде талқыланды.
Кездесу барысында тараптар сауда-экономикалық байланыстарды кеңейту, инвестициялар тарту және Қазақстан мен Гонконг арасындағы кәсіпкерлікті дамыту үшін қосымша мүмкіндіктер жасау мәселелерін қарастырды.
Арман Шаққалиевтің айтуынша, 2025 жылдың қорытындысы бойынша Қазақстан мен Гонконг арасындағы өзара тауар айналымы 178,8 млн АҚШ долларына жеткен. Қазақстан тарапы Гонконг нарығына отандық өнім жеткізу көлемін, оның ішінде агроөнеркәсіптік кешен өнімдерін, сондай-ақ жеңіл және тамақ өнеркәсібі тауарларын ұлғайтуға мүдделі екенін білдірді.
Келіссөздер барысында Қазақстан мен Гонконгтың халықаралық саудадағы рөліне ерекше назар аударылды. Гонконг Азия-Тынық мұхиты өңірінің нарықтарына қол жеткізуге мүмкіндік беретін әлемдегі жетекші қаржы, сауда және логистика орталықтарының бірі ретінде аталды. Ал Қазақстан Орталық Азия, Еуразиялық экономикалық одақ елдері және Еуропа нарықтарына шығуға мүмкіндік беретін маңызды көлік-логистикалық және сауда хабы ретінде қарастырылады.
Кездесу қорытындысы бойынша тараптар практикалық іс-шаралардың бірлескен жоспарын әзірлеуге келісті. Құжатқа бизнес-миссияларды ұйымдастыру, кәсіпкерлер арасында кездесулер өткізу және перспективалы инвестициялық бастамаларды пысықтау шаралары енгізіледі.
Сонымен қатар, тараптар «Бір белдеу – бір жол» халықаралық форумы аясында Қазақстан мен Орталық Азияға арналған арнайы сессия өткізуге уағдаласты.
