29.05.2025, 09:19
Қазақстан мен Грузия мал шаруашылығы өнімдерін экспорттау бойынша жаңа ветеринариялық сертификаттарға қол қойды
Келіссөздердің нәтижесінде айтарлықтай ілгерілеу болды: төрт түрлі ветеринариялық сертификат нысанына қол қойылды
Дүниежүзілік жануарлар денсаулығы ұйымының (WOAH) 92-ші Бас сессиясы аясында Қазақстан Республикасы Ауыл шаруашылығы вице-министрі Аманғали Бердалин мен Грузия Ұлттық азық-түлік агенттігі басшысының орынбасары Василий Басиладзе арасында жұмыс кездесуі өтті.
Кездесу барысында тараптар ветеринариялық бақылау және жануар тектес өнімдердің саудасы саласындағы екіжақты ынтымақтастықтың ағымдағы жай-күйі мен даму перспективаларын талқылады. Ерекше назар экспорттық рәсімдерді жеңілдету, ветеринариялық талаптарды үйлестіру және институционалдық әріптестікті нығайту мәселелеріне аударылды.
Келіссөздердің нәтижесінде айтарлықтай ілгерілеу болды: төрт түрлі ветеринариялық сертификат нысанына қол қойылды. Бұл құжаттар Қазақстаннан Грузияға ірі қара мен ұсақ малдың тірі және союға арналған түрлерін, сондай-ақ шошқа мен шошқа етін экспорттауға ресми рұқсат береді. Сертификаттар қазақстандық өнімдердің грузин нарығына шығуына берік құқықтық негіз қалыптастырады.
Қазақстандық делегация грузиялық тарапқа құжаттарды жедел келіскені үшін алғыс білдіріп, бұл келісімдердің Қазақстан экспортының географиясын кеңейту үшін маңызды екенін атап өтті.
Жаңа сертификаттарға қол қойылуы екі ел арасындағы сауда-экономикалық қатынастарды нығайту жолындағы маңызды қадам болып табылады және қазақстандық мал шаруашылығы өнімдерінің сыртқы нарықтардағы бәсекеге қабілеттілігін арттыруға ықпал етеді.
