13.05.2026, 00:52
Қазақстан мен Тәжікстан АӨК-ті дамыту жөніндегі Жол картасын дайындайды
Тараптар серіктестікті кеңейтуге және жаңа инвестициялық бастамаларды іске асыруға дайын екенін растады
Қазақстан мен Тәжікстан аграрлық саладағы ынтымақтастық жөніндегі Жол картасын әзірлеуде.
Екі елдің ауыл шаруашылығы министрлері АӨК саласындағы сауда, өңдеу және бірлескен жобаларды дамыту мәселелерін талқылады.
Қазақстанның ауыл шаруашылығы министрі Айдарбек Сапаров Душанбе қаласына жұмыс сапары аясында Тәжікстан Республикасының ауыл шаруашылығы министрі Курбон Хакимзодамен кездесті. Келіссөздер барысында тараптар агроөнеркәсіптік кешендегі өзара іс-қимылды кеңейту перспективаларын, азық-түлік қауіпсіздігі мәселелерін және сауда-экономикалық байланыстарды нығайтуды қарастырды.
Айдарбек Сапаровтың айтуынша, Қазақстан мен Тәжікстан арасындағы АӨК өнімдерінің өзара саудасы тұрақты өсімді көрсетіп отыр. 2025 жылдың қорытындысы бойынша тауар айналымы 11,5%-ға өсіп, 595 млн АҚШ долларына жетті. 2026 жылдың бірінші тоқсанында да оң динамика сақталып, өзара сауда көлемі 26,1%-ға артып, 182 млн долларды құрады.
Экспорттың негізгі бөлігін бидай, ұн, өсімдік майлары, арпа, жүгері, ет өнімдері және басқа да тауарлар құрайды.
Қазақстан тарапы инвестициялық ынтымақтастықты кеңейтуге және Тәжікстан инвестицияларын тарта отырып, ұн тарту өндірісі, мал шаруашылығы өнімдерін өңдеу, кондитерлік өнімдер, өсімдік майы, табиғи шырындар мен концентраттар шығару бойынша бірлескен кәсіпорындар құруға қызығушылық білдірді.
Айдарбек Сапаров агроазық-түлік іс-шаралары туралы ақпаратпен тұрақты түрде алмасуды, селекция және тұқым шаруашылығы саласындағы ынтымақтастықты жандандыруды, сондай-ақ технологиялар, білім және тәжірибе алмасуды қамтитын аграрлық ғылым мен білім беру саласындағы серіктестікті нығайтуды ұсынды.
Келіссөздердің жеке тақырыбы Қазақстан мен Тәжікстанның бейінді ведомстволары әзірлеген ауыл шаруашылығы саласындағы ынтымақтастықты дамыту жөніндегі Жол картасын дайындау болды. Құжатқа ағымдағы жылдың екінші жартысында қол қою жоспарланып отыр.
Өз кезегінде Курбон Хакимзода Тәжікстан тарапының Қазақстанмен серіктестікті одан әрі кеңейтуге мүдделі екенін растады. Ол сауда, ауыл шаруашылығы өнімдерін өңдеу, аграрлық ғылым және заманауи технологияларды енгізу салаларындағы өзара іс-қимылдың жоғары әлеуетін атап өтті.
Кездесу қорытындысы бойынша тараптар агроөнеркәсіптік кешендегі серіктестікті нығайту және бірлескен жобаларды іске асыру жұмыстарын жалғастыруға ниетті екенін растады.
