10.07.2025, 12:17
Қазақстан – Қытай: Маңызды көлік келісімі жасалды
Жаңа келісім Қытай мен Қазақстан арасындағы теміржол және логистикалық ынтымақтастықты нығайтады
«Қазақстан темір жолы» ұлттық компаниясы (ҚТЖ) мен Қытайдың мемлекеттік «Қытай темір жолдары» корпорациясы (КЖД) стратегиялық серіктестіктің жаңа келісіміне қол қойды. Жаңа құжат 2014 жылы жасалған бұрынғы келісімді алмастырды. Бұл жөнінде ҚТЖ баспасөз қызметі хабарлады.
Келісім Қазақстан мен Қытай арасындағы көлік саласындағы өзекті ынтымақтастық бағыттарын қамтиды. Құжатта екі ел мен көршілес мемлекеттердің аумағы арқылы өтетін халықаралық транзиттік бағыттарды кеңейту және дамыту, сондай-ақ Қытай мен Еуропа арасындағы жүк ағынын арттыру мақсатында Транскаспий халықаралық көлік бағытын ілгерілету мәселелері көзделген.
Сонымен қатар, көлік дәліздерінің өткізу қабілетін арттыруға бағытталған инфрақұрылымдық жобаларға ерекше назар аударылған. Тараптар контейнерлік тасымал саласындағы ынтымақтастықты нығайтуға, бағыттар мен кестелерді оңтайландыру арқылы жүк тасымалдарының тиімділігін арттыруға келісті.
Сондай-ақ, икемді және бәсекеге қабілетті тарифтік саясат қалыптастыру, шекарааралық тасымалдарды жеңілдету үшін құқықтық-нормативтік базаны үйлестіру жоспарланған. Бұдан бөлек, заманауи цифрлық технологиялар мен стандарттарды енгізу арқылы көлік қауіпсіздігін арттырып, процестерді автоматтандыру көзделген.
ҚТЖ өкілдері Қытаймен көлік-логистикалық ынтымақтастықты нығайту Қытай – Еуропа бағытының тартымдылығын арттырып, Қазақстанның Еуразия кеңістігіндегі негізгі транзиттік хаб ретіндегі стратегиялық рөлін күшейтетінін атап өтті.
