12.09.2025, 11:11
Қазақстан Өзбекстанның жүгері бойынша негізгі жеткізушісіне айналды
Қазақстан Өзбекстанға жүгері жеткізуде көш бастады
2025 жылдың алғашқы жеті айында Өзбекстан айтарлықтай көлемде жүгері импорттады, оның басым бөлігі көрші Қазақстаннан жеткізілді. Ұлттық статистика комитетінің мәліметінше, жалпы импорт көлемі 70,8 мың тоннаны құрап, 20,9 миллион АҚШ долларына жетті. Бұл өткен жылдың сәйкес кезеңімен салыстырғанда 1,7 миллион долларға артық, деп хабарлайды yuz.uz.
Қазақстан көш бастап тұр
Барлық экспорттаушылардың ішінде Қазақстан сенімді түрде бірінші орында. Ол 42,3 мың тонна жүгері жеткізіп, импорттың негізгі бөлігін қамтамасыз етті. Екінші орында Қырғызстан – 24,2 мың тонна. Үштікті 1,9 мың тоннамен Түркия түйіндеді. Қытайдан (1,5 мың тонна) және басқа елдерден (786,4 тонна) аз көлемде өнім әкелінді.
Жүгері импортының өсуі, әсіресе Орталық Азия елдерінен, бірнеше үрдісті көрсетеді. Біріншіден, бұл өңірлік сауда байланыстарының нығаюын білдіреді. Екіншіден, Өзбекстанда жүгеріге деген сұраныстың артып отырғанын көрсетеді. Жүгері мал шаруашылығынан бастап тамақ өнеркәсібіне дейін әртүрлі салаларда қолданылады. Сондай-ақ, бұл Өзбекстанның жеткізушілерін әртараптандырып жатқанын, бірақ сонымен қатар ең жақын көршілеріне көбірек сүйенетінін айқындайды.
