19.02.2026, 11:07
Қазақстан Тәжікстанға агроөнім жеткізілімін арттырды
Жүк тасымалының өсуі елдер арасындағы сауда-экономикалық ынтымақтастықты нығайтады
2025 жылдың қорытындысы бойынша Қазақстан мен Тәжікстан арасындағы жүк тасымалының жалпы көлемі 15,1%-ға өсіп, 5,9 млн тоннаны құрады. Сонымен қатар Қазақстаннан Тәжікстанға экспорт көлемі 7,6%-ға ұлғайып, 2,6 млн тоннаға жетті. Жеткізілім құрылымында астық пен ұн, мұнай өнімдері, қара металдар, түсті кен, өсімдік майы және басқа да өнім түрлері бар.
Бұл туралы «Қазақстан темір жолы» ҰК» АҚ басқарма төрағасы Талғат Алдыбергенов пен «Рохи охани Точикистон» МУК басшысы Комил Мирзоали арасындағы кездесудің қорытындысы бойынша хабарланды.
Келіссөздер барысында тараптар теміржол бағыттарының бәсекеге қабілеттілігін арттыру, өңірдегі сауда-экономикалық ынтымақтастықты нығайту және логистикалық үдерістерді одан әрі интеграциялау бойынша бірлескен жұмысты жалғастыруға ниетті екенін растады. Сондай-ақ құжат айналымын цифрландыру және Орталық Азияны халықаралық нарықтармен байланыстыратын көлік дәліздерін бірлесіп дамыту мәселелері талқыланды.
