18.02.2026, 05:41
Өңделген өнім Қазақстан АӨК экспорты құрылымында 52%-ды құрады
Инвестициялар мен азық-түлік өндірісінің өсуі саланың экспорттық әлеуетін күшейтті
Қазақстан Республикасының Ауыл шаруашылығы министрі Айдарбек Сапаров Үкімет отырысында ауыл шаруашылығы шикізатын өңдеуді дамыту және жоғары қосылған құны бар өнім үлесін арттыру бойынша қабылданып жатқан шаралар туралы баяндады.
Оның айтуынша, қазіргі уақытта өңделген өнім агроөнеркәсіптік кешен экспортының жалпы көлемінің 52%-ын құрайды. Министр бұл көрсеткіш өндірісті әртараптандыру және дайын өнім шығаруды кеңейту бойынша жүргізілген жүйелі жұмыстың нәтижесі екенін атап өтті.
Бұған дейін Қазақстан Президенті үш жыл ішінде АӨК экспортындағы өңделген өнім үлесін 70%-ға дейін жеткізу міндетін қойған болатын.
Ауыл шаруашылығы министрлігінің мәліметінше, 2025 жылдың қорытындысы бойынша азық-түлік өндірісінің көлемі 3,9 трлн теңгені құрап, 2024 жылмен салыстырғанда 8,1%-ға артқан. Саланың негізгі капиталына салынған инвестициялар екі есеге өсіп, 389,4 млрд теңгеге жетті. 2025 жылдың 11 айының қорытындысы бойынша өңделген өнім экспорты $3,2 млрд құрап, өткен жылдың сәйкес кезеңімен салыстырғанда 33,8%-ға өсті.
