19.02.2026, 11:43
Продкорпорация астық және майлы дақылдарды тікелей сатып алуды жалғастыруда
Қосымша шаралар аграрийлерге рентабельділікті сақтап, өнім өткізуді қамтамасыз етуге мүмкіндік береді
Салық заңнамасындағы өзгерістер мен ішкі агроөнім нарығындағы баға ауытқулары жағдайында мемлекеттік қолдау құралдарының маңызы артып отыр. Осыған байланысты «Продкорпорация» АҚ 2024–2025 жылдардағы астық және майлы дақылдар өнімін тікелей сатып алу бағдарламасы аясында қабылдауды жалғастыруда. Бұл бағдарлама аграрийлермен өзара іс-қимылдың ең сұранысқа ие тетіктерінің бірі болып қала береді.
Бағдарлама аясында жолданған өтінімдер басым тәртіппен қаралады. Қатысушыларға құжаттарды жедел рәсімдеу және жедел қаржыландыру қамтамасыз етіледі, бұл шаруашылықтарға көктемгі дала жұмыстарына уақытылы дайындалуға мүмкіндік береді.
2026 жылы сатып алынатын дақылдар тізімі кеңейтілді. Бидай мен арпадан бөлек, ұлттық оператор күнбағыс, майлы зығыр және қарақұмықты қабылдайды. Бұл шешім ауыл шаруашылығы тауарын өндірушілерді кеңінен қамтуға және егіс алқаптарын әртараптандыруды қолдауға бағытталған.
2026 жылғы 16 ақпандағы жағдай бойынша Продкорпорация ресурстарына 114 мың тонна астық жеткізілді. Ең жоғары көлем Ақмола облысының шаруашылықтарынан — 43,7 мың тонна, Солтүстік Қазақстан облысынан — 40 мың тонна және Қостанай облысынан — 24,2 мың тонна сатып алынды.
Бағдарламаға Продкорпорация мен оның аффилирленген құрылымдарының қаржыландыру құралдары бойынша қолданыстағы немесе ұзартылған міндеттемелері жоқ фермерлер мен агроқұрылымдар қатыса алады.
Тікелей сатып алу механизмі мемлекеттік астық резервін толықтыру және жемшөп қорын қалыптастыру үшін қолданылады. Ұлттық оператордың басқаруында жыл сайын шамамен 2 млн тонна мемлекеттік және коммерциялық астық болады, оның 500 мың тоннасы — мемлекеттік резерв, 200 мың тоннасы — жемшөп қоры. Мұндай қорлардың болуы маусымдық және баға ауытқуларын тегістеуге, ішкі нарықта тапшылықтың алдын алуға және әлеуметтік маңызы бар азық-түлік тауарларын өндіруге қажетті шикізаттың тұрақты жеткізілуін қамтамасыз етуге мүмкіндік береді.
Бағдарлама аграрийлерге өнімін әділ бағамен кепілді өткізуге жағдай жасайды және «өндіруші — сатып алушы» тізбегінен делдалдарды алып тастайды. Бұл шаруашылықтардың рентабельділігін сақтауға және әрі қарай дамуын жоспарлауға мүмкіндік береді, сонымен қатар елдің азық-түлік нарығының тұрақтылығын қолдайды.
Бағдарламаға қатысуға өтінімдер Продкорпорацияның өңірлік өкілдіктерінде қабылданады.
