Қазақстан мен Қытай арасындағы контейнерлік тасымал көлемі өсіп келеді

2026 жылдың бірінші жартыжылдығында Қазақстан мен Қытай арасындағы шекаралық теміржол өткелдері арқылы 1,085 млн жиырма футтық баламадағы (ДФЭ) контейнер тасымалданды. Бұл өткен жылдың сәйкес кезеңімен салыстырғанда 6,6%-ға жоғары. Оның ішінде 741,8 мың ДФЭ Қазақстан аумағы арқылы транзитпен өтті, бұл 2025 жылғы көрсеткіштен 10,4%-ға көп.

Бұл мәліметтер Астанада «Қазақстан темір жолы» ҰК» АҚ мен Қытай темір жолдарының «Үрімші темір жолы» ЖШҚ делегациясы арасында өткен жұмыс кеңесінде жарияланды. Кездесу барысында тараптар 2026 жылдың қаңтар–маусым айларындағы жұмыстың қорытындыларын шығарып, жылдық жүк тасымалдау жоспарын орындауға бағытталған шараларды талқылады.

Алты айдың қорытындысы бойынша Қазақстан мен Қытай арасындағы жалпы жүк тасымалының көлемі 18,662 млн тоннаны құрап, өткен жылдың сәйкес кезеңімен салыстырғанда 9,2%-ға өсті. Қазақстаннан Қытайға 11,702 млн тонна жүк жөнелтілді, бұл 2025 жылдың осы кезеңінен 9,5%-ға жоғары. Ал Қытайдан Қазақстанға 6,96 млн тонна жүк тасымалданып, өсім 8,7%-ды құрады.

Кеңесте сондай-ақ Орталық Азия елдері мен Иран Ислам Республикасы бағытына жүк ағынының тұрақты өсіп келе жатқаны, оның ішінде Транскаспий халықаралық көлік бағытын дамыту аясындағы тасымалдардың артып отырғаны атап өтілді. Осы оң үрдісті сақтау үшін тараптар үздіксіз әрі тұрақты логистикалық қызмет көрсетуді қамтамасыз ету бағытындағы бірлескен жұмысты жалғастыруға келісті.

Қазақстан тарапы көрші мемлекеттердің Қытайдан мұнай құю жүктерін импорттауға деген сұранысының артып келе жатқанын хабарлады. Осы бағыттың стратегиялық маңызын ескере отырып, Қазақстан ай сайын 90 мың тоннаға дейін мұнай құю жүктерін қабылдап, өңдеуге дайын екенін растады.

Өз кезегінде Қытай тарапы бұл тасымалдарды қолдауға және сұйық жүк тасымалы көлемін одан әрі арттыру үшін шекара маңындағы инфрақұрылымның технологиялық мүмкіндіктерін бірлесіп зерделеуге дайын екенін білдірді.