Қазақстанда ирандық инвестициялар қатысатын ең ірі ірімшік өндіретін зауыт салынады

Қазақстан Республикасының Ауыл шаруашылығы министрі Айдарбек Сапаров пен ирандық Solico Group азық-түлік холдингінің президенті Голам Али Сулеймани сүтті терең өңдеу саласындағы ірі жобаны іске асыру жөніндегі инвестициялық келісімге қол қойды.

Құжат Қазақстан мен Иран арасындағы сауда-экономикалық ынтымақтастықты дамытудағы кезекті қадам болды және 2025 жылғы желтоқсанда Иран Ислам Республикасы Президентінің Қазақстанға сапары барысында қол қойылған Ынтымақтастық жөніндегі негіздемелік келісім аясында қол жеткізілген уағдаластықтардың жалғасы саналады.

Жоба Алматы облысында жылына 155 мың тонна ірімшік өндіретін заманауи кәсіпорын салуды көздейді. Инвестициялардың жалпы көлемі 35,2 млрд теңгені құрайды. Қазіргі уақытта құрылыс-монтаж жұмыстары басталып кеткен.

Айдарбек Сапаровтың айтуынша, ауыл шаруашылығы шикізатын өңдеу саласына ірі инвесторларды тарту агроөнеркәсіптік кешендегі мемлекеттік саясаттың басым бағыттарының бірі болып табылады.

«Мемлекет басшысы АӨК-тегі өңделген өнім үлесін арттыру және жоғары қосылған құны бар өндірістерді дамыту міндетін қойды. Сүт саласының одан әрі дамуы үшін әлеуеті зор. 2025 жылдың қорытындысы бойынша Қазақстанда ірімшік пен сүзбе өндірісі 13,1%-ға өсті.

Бұл жобаны іске асыру елдің өңдеу қуаттарын айтарлықтай арттыруға, отандық сүт өндірушілер үшін тұрақты өткізу нарығын қалыптастыруға және саланың дамуына қосымша мүмкіндік жасауға мүмкіндік береді. Қазақстан Үкіметі экономиканың басым секторларында жобаларды жүзеге асыратын инвесторларға жан-жақты қолдау көрсетуге дайын», – деді министр.

Solico Group президенті Голам Али Сулеймани Қазақстанды ұзақ мерзімді ынтымақтастық пен инвестициялық қызметті кеңейту үшін перспективалы алаң ретінде қарастыратынын айтты.

«Біз Қазақстанды тек бір жобаны жүзеге асыратын орын ретінде ғана емес, ұзақ мерзімді стратегиялық серіктес ретінде де қарастырамыз. Елдің ауыл шаруашылығы әлеуеті жоғары, географиялық орналасуы тиімді және инвестициялық ахуалы қолайлы. Ірімшік зауытын салумен қатар, біз картоп өңдеу және балалар тағамын өндіру салаларында жаңа жобаларды іске асыру мүмкіндіктерін де зерттеп жатырмыз», – деді ол.

Инвестициялық келісім аясында мемлекет тарапынан өндірістік алаңға қажетті инженерлік инфрақұрылымды тартуды қоса алғанда, бірқатар жеңілдіктер мен қолдау шаралары қарастырылған.

Кәсіпорын құрылысы аяқталып, пайдалануға беру 2029 жылға жоспарланған.

Келісім талаптарына сәйкес инвестор кемінде 400 тұрақты жұмыс орнын құруға, қазақстандық мамандарды оқыту мен даярлауды ұйымдастыруға, сондай-ақ заманауи технологиялар мен өндірістік құзыреттерді беруге міндеттенеді.

Сонымен қатар компания 2028–2038 жылдар аралығында Алматы облысындағы әлеуметтік жобалар мен жергілікті қауымдастықтарды қолдауға жыл сайын шамамен 50 млн теңге бөлуді жоспарлап отыр.

Кәсіпорын іске қосылғаннан кейін ол Қазақстанның сүт өңдеу саласындағы ең ірі жобалардың біріне айналып, шикізат базасын дамытуға, отандық сүтке сұранысты арттыруға, қазақстандық өнім түрлерін көбейтуге және елдің азық-түлік қауіпсіздігін нығайтуға ықпал етеді деп күтілуде.