29.07.2026, 00:53
ҚТЖ Ұлыбританияға тыңайтқыштарды алғашқы мультимодальды тасымалдауды ұйымдастырды
Жүк Қазақстан, Каспий теңізі, Әзербайжан және Грузия арқылы өтетін Транскаспий бағытымен жеткізіледі
«Қазақстан темір жолы» ҰК» АҚ Екібастұздан Ұлыбританияға минералды тыңайтқыштардың алғашқы мультимодальды жөнелтілімін ұйымдастырды. Тасымалдау теміржол және теңіз көлігін үйлестіре отырып, Транскаспий халықаралық көлік бағыты арқылы жүзеге асырылуда.
Жүк Қазақстан аумағы арқылы өтіп, кейін Каспий теңізін кесіп өтіп, Әзербайжан мен Грузия арқылы жеткізіледі. Бұдан кейін тыңайтқыштар Поти және Батуми порттары арқылы теңіз жолымен Ұлыбританиядағы Феликстоу портына жөнелтіледі.
ҚТЖ халықаралық жүк тасымалдарының географиясын кеңейтуді жалғастыруда. Бұған дейін компания Екібастұз – Майами бағыты бойынша қазақстандық өнімнің экспорттық жеткізілімін де ұйымдастырған болатын.
Қазіргі уақытта ұлттық теміржол операторы жүктерді АҚШ, Ұлыбритания, Бельгия, Польша, Чехия және басқа да бірқатар елдерге жеткізуді қамтамасыз етеді.
Осындай жобаларды іске асыру Қазақстанның Еуразиядағы негізгі көлік-логистикалық хабтарының бірі ретіндегі орнын одан әрі нығайтуға ықпал етеді.
