15.01.2026, 16:38
ҚТЖ Алтынкөл–Қорғас бағыты бойынша жүк тасымалдау жоспарының артығымен орындалғанын хабарлады
Алтынкөл–Қорғас: жүк ағыны мен Қытайға экспорттың рекордтық өсуі
Шекаралық өткелде жүк айналымының рекордтық көрсеткіштері тіркеліп, бұл агроөнеркәсіптік секторды қоса алғанда, экспорттаушылар үшін жаңа мүмкіндіктер ашуда.
2025 жылдың қорытындысы бойынша «Алтынкөл — Қорғас» теміржол шекаралық өткелі арқылы тасымалданған жүк көлемі 16,1 млн тоннадан асты. «Қазақстан темір жолы» ұлттық компаниясының мәліметінше, бұл көрсеткіш Темір жолдар ынтымақтастығы ұйымы (ТЖЫҰ) аясында бекітілген жоспарлы индикаторлардан 9%-ға жоғары.
Өсімнің негізгі драйвері Қазақстан өнімдерінің Қытай Халық Республикасына экспорты болды. Бұл бағыттағы жөнелтілім көлемі 5,3 млн тоннаға жетіп, жоспарланған деңгейден 20%-ға артық көрсеткіш көрсетті.
Жүк ағынының артуында контейнерлік тасымалдар да маңызды рөл атқарды. Алтынкөл станциясы арқылы Еуропаға, Ресейге және Орталық Азия елдеріне бағытталған транзит пен экспортты қамтамасыз ететін 3 589 пойыз өтті. Бұл бағыттың тұрақты жұмыс істеуі жүктерді уақытылы жеткізу және шетелдік серіктестер алдындағы келісімшарттық міндеттемелерді орындау үшін аса маңызды.
