08.07.2026, 00:32
ҚТЖ Қазақстан арқылы Қытай мен Мәскеу көлік торабы арасында жаңа тұрақты контейнерлік сервисті іске қосты
Жаңа бағыт контейнерлік тасымалдардың тиімділігін арттырып, қазақстандық астықтың Қытайға экспортын қолдайды
«Қазақстан темір жолы» ҰК» АҚ еншілес ұйымы «KTZ Express» АҚ Қытай – Қазақстан – Ресей (Мәскеу көлік торабы) – Қазақстанның солтүстік станциялары – Қытай бағыты бойынша жаңа тұрақты айналымдық контейнерлік сервисті іске қосты. Жоба контейнерлік паркті тиімді пайдалануға, экспорттық тасымалдарды дамытуға және Қазақстан аумағы арқылы өтетін транзит көлемін арттыруға бағытталған.
Жаңа сервистің іске қосылуына Қытай мен Ресей арасындағы транзиттік тасымалдарға сұраныстың артуы, сондай-ақ Қазақстан астығын Қытайға экспорттау көлемінің ұлғаюы себеп болды.
Логистикалық схемаға сәйкес, жүк тиелген контейнерлік пойыздар Қытайдан Қазақстан аумағы арқылы Мәскеу көлік торабына жеткізіледі. Жүк түсірілгеннен кейін контейнерлер Қазақстанның солтүстік станцияларына жөнелтіліп, онда астық дақылдарымен қайта тиеліп, Қытайға жіберіледі.
Бір толық айналымның орташа ұзақтығы шамамен 20 тәулікті құрайды. KTZ Express маршрут бойындағы тасымалдауды толық ұйымдастырып, контейнерлік жабдықпен қамтамасыз етеді және барлық логистикалық процестерді үйлестіреді. 2026 жылдың сәуір–маусым айлары аралығында жаңа сервис аясында жалпы көлемі 1 600 ЖФЭ болатын 13 контейнерлік пойыз жөнелтілді.
Компанияның мәліметінше, жаңа сервис контейнерлердің бос жүрісін қысқартуға, жылжымалы құрамды пайдалану тиімділігін арттыруға, қазақстандық астықтың Қытайға экспортын қолдауға және Солтүстік дәліз арқылы жүк тасымалы көлемін ұлғайтуға мүмкіндік береді. Сонымен қатар KTZ Express нарық сұранысына сәйкес тасымал көлемін кезең-кезеңімен арттыруды жоспарлап отыр.
