Ақпанда әлемдік азық-түлік бағалары бес айлық төмендеуден кейін өсті

Ақпан айында Біріккен Ұлттар Ұйымының Азық-түлік және ауыл шаруашылығы ұйымы (ФАО) сарапшылары есептейтін әлемдік азық-түлік бағалары индексінің орташа мәні 125,3 пунктті құрады. Бұл көрсеткіш қаңтар айының қайта қаралған деңгейінен 1,1 пунктке (0,9%) жоғары, деп хабарлайды ұйым.

ФАО мәліметінше, индекс мәнінің өсуіне астық, ет және өсімдік майлары бағасының қымбаттауы себеп болды. Бұл факторлар сүт өнімдері мен қант бағасының төмендеуін толықтай өтеп, жалпы көрсеткіштің соңғы бес айдағы үздіксіз төмендеуден кейін алғаш рет өсуіне алып келді.

Ақпан айында астық бағалары индексінің орташа мәні 108,6 пунктті құрады, бұл қаңтар айымен салыстырғанда 1,1 пунктке (1,1%) жоғары. Сонымен қатар көрсеткіш өткен жылдың сәйкес кезеңімен салыстырғанда 4 пунктке (3,5%) төмен деңгейде қалып отыр. Атап айтқанда, ақпан айының қорытындысы бойынша әлемдік бидай бағасы 1,8%-ға өсті. Бағаның өсуіне Еуропа мен АҚШ-тың кейбір аймақтарында аяз болып, егістіктің үсіп кету қаупі туралы хабарламалар әсер етті. Бұған қоса Ресейдегі логистикалық қиындықтар және Қара теңіз өңіріндегі сақталып отырған шиеленіс те бағаның өсуіне ықпал етті.

Жемдік астық бағалары да өткен айда біршама өсті. Бұл ретте әлемдік нарықта жүгері бағасы жалпы алғанда өзгеріссіз қалды, ал арпа бағасы өсуін жалғастырды. Мұндай динамика Қытай тарапынан австралиялық астыққа тұрақты сұраныспен және Солтүстік Африка елдерінің Еуропа нарығында жүргізген сатып алуларымен байланысты болды.

Сарапшылар өсімдік майлары нарығындағы жағдайды да атап өтті. Ақпан айында осы өнімдер бойынша индекс орташа есеппен 174,2 пунктті құрады, бұл қаңтар айымен салыстырғанда 5,6 пунктке (3,3%) жоғары. Осылайша көрсеткіш 2022 жылғы маусымнан бергі ең жоғары деңгейге жетті. Өсім пальма, соя және рапс майы бағасының қымбаттауымен байланысты болды, бұл күнбағыс майы бағасының төмендеуін толықтай өтеді.