Қытаймен шекарада 1500-ге жуық жүк көлігі уақытша жиналып қалды: себебі неде?

 

Қазақстан-Қытай шекарасында жүк көліктерінің уақытша жиналуы байқалады. "Нұр жолы" өткізу бекетінің алдында 1500-ге жуық автомобиль ҚХР-ға кіруді күтіп тұр. Қазақстан Қаржы министрлігінің Мемлекеттік кірістер комитеті (МКК) түсіндіргендей, қалыптасқан жағдай қытай тарапының көлікті қабылдаудың қазіргі қарқынына және бірнеше ілеспе факторларға байланысты.

Ағынның баяулауы соңғы күндері байқалды. МКК деректері бойынша, 2025 жылдың 8-12 қарашасы аралығында қытай тарапы тәулігіне орта есеппен 700-750 автокөлікті ғана қабылдаған.

Бұл көрсеткіштер 22 қазанда ҚР мен ҚХР-дың шекара маңындағы кеден қызметтері басшыларының кездесуінде келісілген жоспарлы деңгейден біршама төмен болып шықты.

Ведомство сол кездесу барысында тәулігіне кемінде 800 жүк көлігін қабылдау туралы уағдаластыққа қол жеткізілгенін еске салды. Жыл соңына дейін бұл көрсеткіш кезең-кезеңімен 1000 бірлікке дейін өседі деп күтілген болатын. Процестің үздіксіздігін қамтамасыз ету үшін қазақстандық Электрондық кезек жүйесіндегі (ЭКЖ) лимиттер дәл осы күтілетін көлемдер негізінде белгіленген еді.

"Нұр жолы" бекетінің жүктемесіне әсер еткен қосымша фактор – (қазақстандық "Қалжат" бекетіне) іргелес жатқан қытайлық "Дулаты" бекетіндегі жұмыстар болды.

"Дулатыда" инспекциялық-тексеру кешенін монтаждау жұмыстарының жүргізілуіне байланысты көлік ағындарының бір бөлігі уақытша "Нұр жолына" қайта бағытталды, бұл оның жүктемесін арттырды.

Жағдайды қалыпқа келтіру және көлік қозғалысын біркелкі қамтамасыз ету үшін лимиттерді оңтайландыру туралы шешім қабылданды.

2025 жылдың 13 қарашасынан бастап Электрондық кезек жүйесінде көлік құралдарын берудің тәуліктік лимиті 650 бірлікке дейін түзетіледі. МКК түсіндіргендей, бұл қадам ағынды қазіргі өткізу мүмкіндіктерімен синхрондауға және тасымалдаушылар үшін болжамдылықты арттыруға мүмкіндік береді.