01.07.2026, 00:25
Мал шаруашылығын жеңілдетілген несиелеуге 300 млрд теңге бөлінді
Мемлекеттік қолдау өндіріс көлемін ұлғайтуға, өнімділікті арттыруға және саланы жаңғыртуға мүмкіндік береді
Астанада Ветеринария қызметі және мал шаруашылығы саласы қызметкерлері күніне арналған салтанатты іс-шара өтті. Оған Үкімет мүшелері, Парламент депутаттары, ғылыми қауымдастық өкілдері, фермерлер, аграрлық кәсіпорындардың басшылары және еліміздің барлық өңірлерінен келген сала ардагерлері қатысты.
Іс-шараға қатысушыларды Премьер-Министр Олжас Бектеновтің атынан Премьер-Министрдің орынбасары – Ұлттық экономика министрі Серік Жұманғарин құттықтады. Ол мал шаруашылығы ауыл шаруашылығының негізгі салаларының бірі екенін және елдің азық-түлік қауіпсіздігін қамтамасыз етуде маңызды рөл атқаратынын атап өтті. Оның айтуынша, Мемлекет басшысының тапсырмасы бойынша Үкімет алдағы бес жылға арналған мал шаруашылығы мен ветеринарияны дамыту жөніндегі кешенді жоспарларды бекітті. Бұл құжаттар саланы жаңғыртуға, оның тиімділігі мен бәсекеге қабілеттілігін арттыруға негіз болады.
2026 жылы мал шаруашылығын жеңілдетілген несиелеу бағдарламаларына 300 млрд теңге қарастырылған. Мемлекеттік қолдаудың жаңа тетіктері өндіріс көлемін ұлғайтуға, өнімділікті арттыруға және ауыл шаруашылығы тауарын өндірушілер үшін қосымша мүмкіндіктер жасауға мүмкіндік береді деп күтілуде.
Серік Жұманғарин Үкімет заманауи технологияларды енгізуге, экспорттық әлеуетті дамытуға, өткізу нарықтарын кеңейтуге және ауыл еңбеккерлерінің әл-ауқатын арттыруға бағытталған жұмысты жалғастыратынын айтты.
Ауыл шаруашылығы министрі Айдарбек Сапаров мал шаруашылығы мен ветеринария саласы мамандарын бірлесіп марапаттаудың символдық мәні бар екенін атап өтіп, тиімді мал шаруашылығы мықты ветеринариялық қызметсіз мүмкін еместігін айтты. Оның мәліметінше, 2025 жылдың қорытындысында мал шаруашылығының жалпы өнім көлемі 3,8 трлн теңгеге жетіп, 3,3%-ға өсті.
Министрдің айтуынша, 2026–2030 жылдарға арналған мал шаруашылығын дамыту жөніндегі кешенді жоспар әзірленді. Ол саланы жаңғыртуды, өндіріс көлемін арттыруды және мемлекеттік қолдау тетіктерін жетілдіруді көздейді.
Жоспар аясында «Игілік», «Береке» және «Жайлау» жеңілдетілген несие өнімдері іске қосылды. Олар асыл тұқымды мал сатып алуға, айналым қаражатын толықтыруға және жайылым инфрақұрылымын дамытуға арналған. Сонымен қатар, заманауи көбею технологияларын енгізуге және асыл тұқымды мал шаруашылығын дамытуға бағытталған мемлекеттік қолдау күшейтілуде.
Министр ветеринария саласының дамуына да ерекше тоқталды. Оның айтуынша, 2026–2030 жылдарға арналған ветеринарияны дамыту жөніндегі кешенді жоспар қабылданды. Құжат ветеринариялық инфрақұрылымды жаңғыртуды және мамандарды материалдық қамтамасыз ету деңгейін арттыруды көздейді.
Ветеринариялық инфрақұрылым нысандарын салуға және жаңғыртуға, зертханаларды заманауи жабдықтармен қамтамасыз етуге, мамандандырылған көлікті жаңартуға және материалдық-техникалық базаны нығайтуға 66 млрд теңге қарастырылған. Бұдан бөлек, ветеринария мамандарының жалақысын көтеруге және кадрлық әлеуетті дамытуға тағы 22 млрд теңге бөлінеді.
Іс-шара марапаттау рәсімімен аяқталды. Серік Жұманғарин мал шаруашылығы мен ветеринария саласының үздік өкілдеріне «Құрмет» орденін және Қазақстан Республикасы Премьер-Министрінің Алғыс хаттарын табыс етті. Ауыл шаруашылығы министрі Айдарбек Сапаров сала қызметкерлерін ведомстволық медальдармен, төсбелгілермен және Құрмет грамоталарымен марапаттады.
