17.06.2026, 04:48
Қазақстанда тәулігіне 1 млн жұмыртқа өңдейтін кәсіпорын салынады
Жаңа өндіріс жоғары қосылған құны бар өнім шығаруды ұлғайтып, 80 жаңа жұмыс орнын құруға мүмкіндік береді
Ақмола облысында тауық жұмыртқасын терең өңдеу кәсіпорнын құруға бағытталған инвестициялық жобаны іске асыру басталды. Жаңа өндірістің қуаттылығы тәулігіне 1 млн жұмыртқаға дейін жетеді.
Жобаны «Kaz Eggs» ЖШС жүзеге асырады. Өндірістік кешен Ақмола облысы Целиноград ауданының Ақмол ауылында салынады.
Кәсіпорын құрылысына салынатын инвестиция көлемі 30 млрд теңгені құрайды. Нысанды пайдалануға беру 2027 жылдың төртінші тоқсанына жоспарланған.
Кешен іске қосылғаннан кейін 80 жаңа жұмыс орны ашылады.
Жобаны жүзеге асыру елдегі өңдеу өнеркәсібінің дамуына және жоғары қосылған құны бар өнім өндірісін кеңейтуге ықпал етеді деп күтілуде.
Ауыл шаруашылығы шикізатын өңдеуді дамыту Қазақстан агроөнеркәсіптік кешенінің негізгі бағыттарының бірі болып қала береді.
ҚР Ауыл шаруашылығы министрлігі заманауи өндірістерді құруға, отандық өнімнің бәсекеге қабілеттілігін арттыруға және мемлекеттің азық-түлік қауіпсіздігін қамтамасыз етуге бағытталған инвестициялық жобаларды қолдауды жалғастыруда.
