Сату ма әлде күту ме? Фермерлер мен трейдерлерге жаңартылған ұсыныстар

«Қазақстан. Дәнді және майлы дақылдар» ғылыми-зерттеу бюросының мәліметінше, елімізде дәнді және майлы дақылдар нарығында салыстырмалы баға тұрақтылығы сақталып отыр. Бағаларда күрт ауытқулар байқалмағанымен, сарапшылар фермерлер мен трейдерлерге әр дақыл бойынша нарықтық сигналдарды ескеріп, селективті қадамдар жасауға кеңес береді.

Дәнді дақылдар: ұстаным — ұстап тұру және кезең-кезеңімен сату
28% және одан жоғары клейковинасы бар 3-класс жұмсақ бидай бағасы ең тұрақты күйде қалып отыр. Сарапшылар бұл санат бойынша сатуды уақытша тоқтатуды ұсынады — бағаның 145 тг/кг-ге дейін өсу мүмкіндігі бар.

Клейковинасы 25% және 23% дейінгі 3-класс бидай үшін — баға өсу әлеуеті шектеулі болғандықтан, қалыпты мөлшерде сатуға болады: болжамды максимум — тиісінше 95 және 85 тг/кг.

4-класс бидай да тұрақты, айтарлықтай өзгеріс жоқ — сату сұранысқа қарай жүзеге аса алады.

5-класс бойынша аздаған төмендеу байқалды (–1 тг/кг), алайда импорттаушылардың қызығушылығы жоғары. Қолдағы көлем аз болғандықтан, сату әлі де орынды.

2-класс арпаның бағасы 89 тг/кг деңгейінде. Сарапшылар бұл жерде де сатуды уақытша тоқтатуға шақырады.

Қатты бидай (дурум) бойынша жағдай ерекше: 14% және одан жоғары ақуыз құрамына ие партиялар, әсіресе 15%+ деңгейдегі түрлері экспортқа үлкен сұранысқа ие — сарапшылар сатуды ұсынады. Бағасы 110–130 тг/кг аралығында болуы мүмкін.

Майлы және бұршақ дақылдары
Майлы дақылдар нарығында да бағалар тұрақты. Саудагерлердің көпшілігі күту позициясын ұстануда, әсіресе елімізде зығыр тапшы болып тұрған сәтте. Қазіргі баға — 260 тг/кг. Сарапшылар сатуды уақытша тоқтата тұруға кеңес береді.

Күнбағыс үшін де ұқсас жағдай — бағасы 185 тг/кг болғанымен, 190 тг/кг-ге дейін өсім болуы мүмкін.

Рапс, соя, қыша, бұршақ және жасымық бойынша — қалыпты сатылым ұсынылады. Ең жоғары баға болжамдары: рапс — 250 тг/кг, соя — 225 тг/кг, қыша — 300 тг/кг дейін.

Қызыл және ірі жасыл жасымықтың да бағалық әлеуеті жоғары.
Сафлор бөлек айтылады — 138 тг/кг деңгейінде тұрақты тұрған баға бойынша сарапшылар сатуды ұсынып отыр, өйткені төмендеу қаупі бар.

Жалпы алғанда, нарық — тұрақты, бірақ сақтықты талап етеді. Сарапшылар фермерлерге сұранысқа қарай сатуды жалғастырып, экспорттық сұранысы бар дақылдарда пайда бекітуді ұсынады.