14.07.2026, 00:02
2026 жылы «Азық-түлік корпорациясы» аграршыларды қолдауға 65,7 млрд теңгеге дейін қаржы бағыттайды
Қаражат ауыл шаруашылығы өнімдерін тікелей сатып алуға, форвардтық қаржыландыруға және мемлекеттік астық қорларын толықтыруға жұмсалады
2026 жылы «ҰК «Азық-түлік корпорациясы» АҚ ауыл шаруашылығы тауарын өндірушілерді ауқымды қаржылай қолдауды жалғастырады. 2026 жылдың бірінші жартыжылдығының қорытындысы бойынша ұлттық оператор фермерлік шаруашылықтардың шоттарына 51,6 млрд теңге аударды. Форвардтық келісімшарттар орындалып, жеткізілген өнім үшін түпкілікті есеп айырысудан кейін аграршыларды қаржыландырудың жалпы көлемі 65,7 млрд теңгеге дейін жетуі мүмкін.
Қаржыландырудың едәуір бөлігі «Азық-түлік корпорациясының» меншікті айналым қаражаты есебінен жүзеге асырылады. Бұрын компанияның жарғылық капиталын ұлғайтуға бөлінген мемлекеттік қаражат бүгінде револьверлік қағидат бойынша пайдаланылып, келісімшарттар орындалып, ауыл шаруашылығы өнімдері сатылғаннан кейін қайтадан аграршыларды қаржыландыруға бағытталады.
«ҰК «Азық-түлік корпорациясы» АҚ басқарма төрағасы Асылхан Жувашевтің айтуынша, мұндай тәсіл ауыл шаруашылығы өндірушілерін жыл сайын қолдауға және бюджетке қосымша салмақ түсірмей қаржыландыру көлемін ұлғайтуға мүмкіндік береді.
Айналымға қайта түсетін қаражат аграршыларды қолдаудың ең сұранысқа ие құралдары – ауыл шаруашылығы өнімдерін тікелей сатып алу және көктемгі егіс жұмыстарын форвардтық қаржыландыру бағдарламаларын іске асыруға жұмсалады.
Тікелей сатып алу бағдарламасы аясында фермерлер «Азық-түлік корпорациясына» 191,8 мың тонна дәнді және майлы дақыл жеткізді. Бұл 2025 жылғы көрсеткіштен (92,9 мың тонна) екі еседен астам жоғары. Ұлттық операторға бидай, арпа, күнбағыс және майлы зығыр жеткізу бойынша барлығы 257 ауыл шаруашылығы өндірушісінен өтінім түсті. Жасалған келісімшарттар бойынша фермерлерге 20,3 млрд теңге төленді.
Көктемгі егіс жұмыстарын форвардтық қаржыландыру бағдарламасына тағы 172 ауыл шаруашылығы құрылымы қатысып, 471 мың тонна дәнді және майлы дақыл жеткізуге келісімшарт жасасты. Ақмола, Солтүстік Қазақстан және Қостанай облыстарының шаруашылықтары негізінен үшінші сыныпты бидай жеткізсе, Павлодар және Шығыс Қазақстан облыстарының фермерлері күнбағыс тапсырады. Көктемде ұлттық оператор аванстық төлемдер ретінде 31,3 млрд теңге бөлді, ал егін жиналғаннан кейінгі қосымша төлемдерді есептегенде қаржыландыру көлемі 40 млрд теңгеден асады.
Форвардтық бағдарлама жоғары маржалы дақылдар өндірісінің өсуіне де ықпал етуде. Егер 2025 жылы форвардтық келісімшарттар бойынша 36 мың тонна күнбағыс, майлы зығыр және рапс жеткізу көзделсе, 2026 жылы бұл көлем шамамен үш есеге өсіп, 94,9 мың тоннаға жетті. Егін жиналғаннан кейін аграршылар 37,8 мың тонна күнбағыс тұқымын, 51,5 мың тонна майлы зығыр тұқымын және 5,6 мың тонна рапс жеткізуді жоспарлап отыр.
«Азық-түлік корпорациясының» мәліметінше, тікелей сатып алу және форвардтық қаржыландыру тетіктері аграршыларды қолжетімді қаржымен қамтамасыз етумен қатар, елдің стратегиялық астық қорларын толықтыруға мүмкіндік береді. Жыл сайынғы ауыл шаруашылығы өнімдерін сатып алу арқылы мемлекеттік астық ресурстары жаңартылып, мал және құс шаруашылығына арналған жемдік қор қалыптастырылады, сондай-ақ ұн тарту және басқа да қайта өңдеу кәсіпорындары үшін астық қоры жасақталады.
