10.07.2026, 00:28
Қазақстанда азық-түлік өндірушілері үшін электр энергиясының тарифтері төмендетілуі мүмкін
Жаңа қолдау шарасы өндірістік шығындарды азайтып, әлеуметтік маңызы бар азық-түлік тауарларының бағасын тұрақтандыруға бағытталған
Қазақстан Республикасы Ұлттық экономика министрлігі қоғамдық маңызы бар нарықтардағы баға белгілеу қағидаларына өзгерістер енгізуді көздейтін бұйрық жобасын әзірледі. Құжат әлеуметтік маңызы бар азық-түлік тауарларын өндірушілерді электр энергиясының құнын төмендету арқылы мемлекеттік қолдаудың жаңа тетігін енгізуді көздейді.
Министрліктің мәліметінше, электр энергиясына жұмсалатын шығын әлеуметтік маңызы бар азық-түлік өнімдерінің өзіндік құнының маңызды бөлігін құрайды. Осыған байланысты өндірушілерге қолданыстағы босату тарифінен 20%-ға дейін төмен тарифпен электр энергиясын сатып алу мүмкіндігін беру ұсынылып отыр.
Жеңілдетілген тарифті әлеуметтік маңызы бар азық-түлік тауарларының бағасын тұрақтандыру жөнінде орталық мемлекеттік органмен немесе жергілікті атқарушы органмен меморандум жасасқан кәсіпорындар пайдалана алады. Сонымен қатар төмендетілген тариф тек осы өнімдерді өндіруге тікелей жұмсалатын электр энергиясының көлеміне ғана қолданылатын болады.
Жаңа қолдау шарасы нан, ұн, сүт өнімдері, қант, жұмыртқа, ет және әлеуметтік маңызы бар азық-түлік тауарлары тізіміне енгізілген басқа да өнімдерді өндірушілерге арналған. Электр энергиясы шығындарының төмендеуі кәсіпорындарға өндірістік шығындарды қысқартуға және өнімнің босату бағасын тұрақты деңгейде сақтауға мүмкіндік береді.
