02.07.2026, 23:51
«Продкорпорация» 2025 жылдың қорытындысы бойынша қарыз жүктемесін екі есеге жуық қысқартты
Экспорт көлемінің артуы, оң қаржылық нәтиже және аграршыларды қолдау тетіктерін дамыту компания қызметінің 2025 жылғы негізгі қорытындылары болды
Қазақстанның ұлттық астық операторы 2025 жылдың қорытындысы бойынша қарыз жүктемесін екі есеге жуық азайтып, ауыл шаруашылығы өнімдерінің экспортын ұлғайтты және аграршыларды мемлекеттік қолдау шараларын іске асыруды жалғастырды. «ҰК «Продкорпорация» АҚ қызметінің қорытындылары компанияның Қоғамдық кеңесінің отырысында қаралды.
«ҰК «Продкорпорация» АҚ басқарма төрағасы Асылхан Джувашевтің айтуынша, күрделі жағдайларға қарамастан, компания жылды оң қаржылық нәтижемен аяқтады. Компаниялар тобының шоғырландырылған таза пайдасы 492,5 млн теңгені, ал тікелей Продкорпорацияның таза пайдасы 419,8 млн теңгені құрады.
Оның айтуынша, биылғы жылғы негізгі міндеттердің бірі – қарыз міндеттемелерін одан әрі қысқарту. Жыл соңына дейін олардың көлемін шамамен 20 млрд теңгеге дейін төмендету жоспарланып отыр.
Продкорпорация басшысы компания қаржылық сауықтыруды отандық ауыл шаруашылығы тауарын өндірушілерді қолдау жөніндегі мемлекеттік міндеттерді орындаумен қатар жүргізе алғанын атап өтті.
Мұндай қолдаудың негізгі құралдарының бірі – ұлттық оператордың сатып алу саясаты. Жыл сайын Продкорпорация астық дақылдарына сатып алу бағаларын белгілейді, олар нарық қатысушылары үшін бағдар болып табылады. 2025 жылы сатып алу бағасының өсуі ауыл шаруашылығы өндірушілеріне өнімдерін тиімді бағамен сатуға мүмкіндік беріп, сала үшін елеулі экономикалық нәтиже берді. Сарапшылардың бағалауынша, оның жиынтық әсері шамамен 150 млрд теңгені құрады.
Өткен жылы компания астық экспортының географиясын айтарлықтай кеңейтті. Қазақстандық өнім Марокко, Алжир және Вьетнам сияқты жаңа алыс нарықтарға жеткізілді. Сонымен қатар астықтың едәуір көлемі Орталық Азия елдеріне экспортталып, Әзербайжанға жеткізілімдер қайта жанданды.
Асылхан Джувашевтің айтуынша, соңғы екі жылдағы рекордтық өнімнен кейін Продкорпорацияның негізгі міндеттерінің бірі қазақстандық астықты сыртқы нарықтарға шығару болды. Бұл бағытта Қазақстан Республикасы Үкіметі мен Ауыл шаруашылығы министрлігі ұсынған көлік субсидиялары маңызды рөл атқарды. Соның нәтижесінде отандық ауыл шаруашылығы өндірушілері астық экспортының тарихи ең жоғары көлеміне қол жеткізді.
Ұлттық астық операторының жұмыс нәтижелеріне «ҰК «Продкорпорация» АҚ Қоғамдық кеңесінің мүшесі, Майлы дақылдарды қайта өңдеушілердің ұлттық қауымдастығының төрағасы Ядыкар Ибрагимов оң баға берді. Оның айтуынша, компания менеджменті мемлекеттік кәсіпорынды оң қаржылық нәтижеге шығарып, квазимемлекеттік сектордағы басқа ұйымдарға үлгі көрсетті.
Сонымен қатар Ұлттық қауымдастық басшысы Қазақстан астығының Оңтүстік-Шығыс Азия нарықтарындағы позициясын нығайту үшін Қытай арқылы логистикалық бағыттарды белсенді дамыту қажеттігін атап өтті.
Отырыс соңында Қоғамдық кеңес «Азық-түлік келісімшарт корпорациясы» ҰК» АҚ-ның 2021–2030 жылдарға арналған даму жоспарына енгізілетін өзгерістерді қарады. Түзетулер Қазақстан Республикасы Конституциясының жаңартылған ережелерінің күшіне енуіне байланысты әзірленіп, стратегиялық құжатты қолданыстағы заңнамаға сәйкестендіруге бағытталған.
Отырыс қорытындысы бойынша Қоғамдық кеңес Продкорпорацияның 2025 жылға арналған жылдық есебін назарға алып, компанияның даму жоспарына енгізілетін өзгерістерді қолдады.
