26.06.2026, 00:39
Продкорпорация аграршыларды қолдау үшін ЕАДБ-дан 100 млн АҚШ доллары көлемінде қаржы тартады
Кредиттік желі аграрлық секторды қолдау аясын кеңейтіп, басым ауыл шаруашылығы дақылдарының өндірісін ынталандыруға мүмкіндік береді
Еуразиялық даму банкі (ЕАДБ) мен «Продкорпорация» АҚ 100 млн АҚШ доллары көлемінде кредиттік келісімге қол қойды. ЕАДБ баспасөз қызметінің хабарлауынша, тартылған қаражат ұлттық астық операторының жобаларын іске асыруға, сондай-ақ ауыл шаруашылығы тауарын өндірушілерді қаржыландыруға, басым ауыл шаруашылығы дақылдарын өсіруді ынталандыруға және ішкі нарықта өсімдік шаруашылығы өнімдерінің тұрақты ұсынысын қамтамасыз етуге бағытталады.
«Продкорпорация» АҚ басқарма төрағасының бірінші орынбасары Ілдар Исмағұловтың айтуынша, жаңа қаржыландыру ұлттық оператордың агроөнеркәсіптік кешенді қолдау мүмкіндіктерін кеңейтеді.
«Біз ЕАДБ-ға стратегиялық әріптестігі үшін алғысымызды білдіреміз. Қаржыландыру туралы шешім Продкорпорацияға Қазақстанның ғана емес, бүкіл өңірдің азық-түлік тұрақтылығын қамтамасыз ететін мемлекеттік институт ретінде сенім білдірілгенін көрсетеді», — деді Ілдар Исмағұлов.
Өз кезегінде ЕАДБ басқарма төрағасының орынбасары Руслан Дәленов қол қойылған келісім Банк пен Продкорпорация арасындағы ұзақ мерзімді ынтымақтастықтың кезекті кезеңі болғанын атап өтті.
«ЕАДБ үшін қатысушы мемлекеттердің экономикаларының тұрақты дамуына, соның ішінде агроөнеркәсіптік кешенді қолдау арқылы үлес қосу маңызды», — деді Руслан Дәленов.
Еуразиялық даму банкі – Еуразия кеңістігінде инвестициялық қызметті жүзеге асыратын көпжақты даму банкі. 2025 жылдың желтоқсан айының соңындағы жағдай бойынша ЕАДБ-ның жиынтық инвестициялық портфелі жалпы құны 19,6 млрд АҚШ долларын құрайтын 326 жобаны қамтыды. Портфельдің негізгі бөлігін көлік инфрақұрылымы, цифрлық технологиялар, жасыл энергетика, ауыл шаруашылығы, өнеркәсіп және машина жасау салаларындағы интеграциялық әсері бар жобалар құрайды. Өз қызметінде Банк БҰҰ-ның Тұрақты даму мақсаттары мен ESG қағидаттарын басшылыққа алады.
«Продкорпорация» – Қазақстанның астық нарығындағы 100 пайыз мемлекеттік қатысуы бар ұлттық оператор. Компания астық нарығында тұрақтандыру функцияларын орындау, сондай-ақ мемлекеттік астық резерві мен жем-шөп қорын басқару арқылы елдің азық-түлік қауіпсіздігін қамтамасыз етеді.
