29.06.2026, 01:18
Қазақстан өнімдері ШҰАА-дағы ірі сауда желісінің сөрелеріне шығарылады
Отандық азық-түлік өнімдерінің алғашқы партиясы Қытайға жөнелтілді
Қазақстандық азық-түлік өндірушілері өз өнімдерін Қытайдың Шыңжаң Ұйғыр автономиялық ауданындағы ең ірі сауда желілерінің бірінде ұсыну мүмкіндігіне ие болады. Тиісті алдын ала келісімге мыңнан астам дүкенді біріктіретін «8:30» сауда желісімен қол жеткізілді.
Қазақстан Республикасы Үкіметінің баспасөз қызметінің хабарлауынша, алғашқы кезеңде Sun Planet, Delis және Run Planet қазақстандық брендтерінің өнімдерін желінің 200–300 сауда нүктесінде сынақ ретінде орналастыру жоспарланып отыр.
Қазақстандық өкілдіктің қолдауымен Қытай нарығында «Алан и Компания» және Baysan Group компанияларының өнімдерін ілгерілетуге бағытталған келісімдерге де қол қойылды.
Сонымен қатар, көлемі 20 тонна болатын қазақстандық тауарлардың Қытайға алғашқы пилоттық жеткізілімі ұйымдастырылды. Экспорттық партия құрамына «Сұлтан» макарон өнімдері, «Пиала» шайы, RG Brands компаниясының шырындары және кондитерлік өнімдер кірді.
Қол жеткізілген келісімдер Үрімжі қаласында өткен XI «Қытай – Еуразия» көрмесі аясындағы «Қытайға экспорт: Қазақстан» атты арнайы сессия барысында таныстырылды. Іс-шарада Қазақстан Республикасы Премьер-министрінің орынбасары – ұлттық экономика министрі Серік Жұманғарин сөз сөйледі.
Оның айтуынша, ҚХР Коммерция министрлігінің «Қытайға экспорт» бастамасы қазақстандық өндірушілер үшін ерекше маңызға ие, өйткені ол Қытай нарығына шығу үшін қосымша мүмкіндіктер ашады. Бұл бастама импорттаушылармен, ірі сауда желілерімен, жетекші маркетплейстермен және Қытайдың логистикалық операторларымен тікелей байланыс орнатуға мүмкіндік береді.
Үкімет Қазақстанның көлік-логистикалық инфрақұрылымды жаңғырту, шекара маңы ынтымақтастық орталықтарын дамыту және халықаралық көлік дәліздерінің өткізу қабілетін кезең-кезеңімен арттыру арқылы сауда-инвестициялық ынтымақтастықты жүйелі түрде дамытуды жалғастырып жатқанын атап өтті.
