08.07.2026, 01:07
Талғат Алдыбергенов ҚТЖ басқарма төрағасы қызметінен кетті
Ұлттық теміржол компаниясы басшысының өкілеттігі жалғыз акционердің шешімімен тоқтатылды
Талғат Алдыбергенов «Қазақстан темір жолы» ҰК» АҚ басқарма төрағасы қызметінен босатылды. Тиісті шешімді компанияның жалғыз акционері – «Самұрық-Қазына» АҚ қабылдап, соған сәйкес оның өкілеттігі мерзімінен бұрын тоқтатылды.
ҚТЖ-ның жаңа басшысы кім болатыны әзірге жарияланған жоқ. Талғат Алдыбергенов ұлттық теміржол компаниясын 2025 жылдың шілде айынан бері басқарған.
Бұған дейін 2025 жылдың қорытындысы бойынша ҚТЖ-ның негізгі басқарушы персоналына төленген сыйақы көлемі 1,036 млрд теңгені құрағаны хабарланған болатын. Салыстыру үшін, 2024 жылдың қорытындысында бұл көрсеткіш 816 млн теңге болған.
Бұл төлемдерге түсініктеме берген Талғат Алдыбергенов аталған сомаға тек басқарма мүшелеріне ғана емес, сондай-ақ компанияның директорлар кеңесінің мүшелеріне төленген сыйақылар да кіретінін айтқан. Жалпы төлемдер 19 басшы арасында бөлінген. Оның айтуынша, сыйақылар ұлттық компания пайда тапқан жағдайда ғана төленеді, ал оларды төлеу туралы шешімді ҚТЖ директорлар кеңесі қабылдайды.
Сондай-ақ ол 2024 жылдың қорытындысы бойынша компанияның таза пайдасы шамамен 185 млрд теңгені, ал 2025 жылы 340 млрд теңгені құрағанын атап өткен.
Бұдан бөлек, Алдыбергеновтің айтуынша, 2025 жылы өндірістік персонал өкілдеріне шамамен 101 млрд теңге көлемінде сыйақы төленген. Ал 2024 жылы бұл көрсеткіш 68 млрд теңгені құраған.
