01.04.2026, 01:11
Қазақстан мен Қытай арасындағы транзит ұзақ мерзімді даму стратегиясына ие болады
Тараптар инфрақұрылымды үйлестіруді, логистикалық хабтарды кеңейтуді және цифрлық шешімдерді енгізуді жоспарлап отыр
Қазақстан мен Қытай транзиттік әлеуетті дамытуға және тасымал көлемін арттыруға бағытталған ұзақ мерзімді бағдарламаны әзірлеу туралы келісімге келді. Құжат шекаралық және порттық инфрақұрылымды синхронды дамыту, көлік-логистикалық хабтарды құру және кеңейту, сондай-ақ теміржол машина жасау саласындағы ынтымақтастықты тереңдетуді көздейді. Сонымен қатар, тараптар цифрлық технологияларды енгізуді жалғастыруға ниетті.
Аталған келісімдер Бейжіңде өткен теміржол көлігі саласындағы ынтымақтастық жөніндегі Қазақстан-Қытай қосалқы комитетінің 16-отырысының қорытындысы бойынша қол жеткізілді. Кездесу Қазақстан Республикасы көлік вице-министрі Жанибек Тайжановтың және Қытай Халық Республикасының Мемлекеттік теміржол басқармасы басшысының орынбасары У Дэджиннің төрағалығымен өтті.
Отырыс барысында тараптар екі ел арасындағы теміржол тасымалдарының қазіргі жағдайы мен даму перспективаларын, сондай-ақ транзиттік әлеуетті одан әрі арттыру мәселелерін талқылады. Тасымал көлемінің өсуінің оң динамикасы және теміржол инфрақұрылымын жаңғырту бойынша жүргізіліп жатқан жұмыстар атап өтілді.
Тараптар Транскаспий халықаралық көлік бағытының стратегиялық маңыздылығын атап өтіп, оны одан әрі дамытуға мүдделілігін растады. Атап айтқанда, Ақтау және Құрық порттарының инфрақұрылымын жаңғырту арқылы 2029 жылға қарай контейнерлік транзит көлемін 3000 пойызға жеткізу жоспарлануда.
