12.02.2026, 04:58
Атырау облысында қуаттылығы 15,5 мың тонна болатын көкөніс қоймасы іске қосылды
Кешен өнімді сақтау мен таратудың мүмкіндіктерін кеңейтеді
Өңірде заманауи «ITC WEST» логистикалық орталығы жұмысын бастады, оның құрамында сыйымдылығы 15,5 мың тонна болатын көкөніс қоймасы іске қосылды. Бұл – Батыс Қазақстандағы ауқымы мен технологиялық деңгейі жағынан алғашқы нысан. Жоба агрологистиканы дамытуға және әлеуметтік маңызы бар азық-түлік тауарларының бағасын тұрақтандыруға бағытталған.
Кешеннің жалпы аумағы 30 гектарды құрайды. Логистикалық торап ыңғайлы көлік аймағында орналасқан және бес теміржол тармағын, контейнер алаңын, жалпы көлемі 5 400 шаршы метр болатын «А» санатындағы қоймаларды, өндірістік нысандарды және көкөніс өнімдеріне арналған арнайы сақтау орнын қамтиды.
Көкөніс қоймасының аумағы 8 200 шаршы метр. Мұнда –25-тен +25 градусқа дейінгі реттелетін температура режимі бар 28 сақтау камерасы орналастырылған. Нысан температура мен ылғалдылықты автоматты бақылау жүйелерімен, заманауи тоңазытқыш қондырғыларымен, желдету және микроклиматты басқару жүйелерімен жабдықталған. Энергия тиімді инженерлік шешімдер кешеннің үздіксіз әрі үнемді жұмысын қамтамасыз етеді.
Орталық басшысы Бауржан Жолмұхановтың айтуынша, кешеннің ерекшеліктерінің бірі – банандарды пісіріп-жетілдіруге арналған камера. Тұтынушылар сұранысына қарай өнімді кезең-кезеңімен қажетті жетілу деңгейіне жеткізіп, сауда желілеріне уақытылы жөнелтуге болады.
