01.04.2026, 00:47
Қазақстанда 3287 аграрий егіс науқанына ерте қаржыландыруға қол жеткізді
Қаражат жанар-жағармайға, тыңайтқыштарға, техника мен тұқымға бағытталуда
2026 жылғы көктемгі дала жұмыстарына арналған қаржыландыру бағдарламасын іске асыру жалғасуда. Өтінімдерді қабылдау 2025 жылғы 1 қазанда Мемлекет басшысының егіс жұмыстарын уақтылы және сапалы жүргізуді қамтамасыз ету жөніндегі тапсырмасы аясында басталды. Ауыл шаруашылығы тауар өндірушілері үшін сыйақының соңғы мөлшерлемесі жылдық 5% құрайды.
Қазіргі уақытта жалпы сомасы 556 млрд теңгені құрайтын 3963 ауыл шаруашылығы тауар өндірушісінен пул қалыптастырылды. Бүгінгі күні 334 млрд теңге сомасына 3287 өтінім қаржыландырылды, бұл 4 млн гектардан астам егіс алқабын қамтиды.
Сонымен қатар «Даму» қоры арқылы несиелерге кепілдік беру тетігі іске асырылуда, ол несие сомасының 85%-ына дейін кепілдік беруге мүмкіндік береді. Қазіргі уақытта 148 млрд теңге сомасындағы несиелер бойынша 753 кепілдік берілді.
Ерте қаржыландыру аграрийлерге 2026 жылғы егіс науқанына алдын ала дайындалуға мүмкіндік береді. Тартылған қаражат жанар-жағармай материалдарын тиімді бағамен сатып алуға, минералдық тыңайтқыштар алуға, ауыл шаруашылығы техникасын жөндеуге және қажетті тұқым қорын қалыптастыруға бағытталады.
Жеңілдетілген қаржы ресурстары көктемгі дала жұмыстарын дайындау мен жүргізуге, сондай-ақ орақ науқаны мен маусымдық шығындарды жабуға қолжетімді. Қаржыландыру Аграрлық несие корпорациясының филиалдық желісі және бүкіл ел бойынша серіктес қаржы институттары (екінші деңгейлі банктер, әлеуметтік-кәсіпкерлік корпорациялар, кредиттік серіктестіктер, өңірлік инвестициялық орталықтар және микроқаржы ұйымдары) арқылы жүзеге асырылады.
