07.07.2026, 01:24
Қазақстанға Қырғызстаннан әкелінген зиянкестер жұқтырған қара өрік пен шие өткізілмеді
Зиянкестер жұқтырған жеміс өнімі Қазақстан аумағына кіргізілмей, жөнелтушілерге кері қайтарылды
Қазақстан Республикасы Ауыл шаруашылығы министрлігі Агроөнеркәсіптік кешендегі мемлекеттік инспекция комитетінің Жамбыл облысы бойынша аумақтық инспекциясы қауіпті карантиндік зиянкестермен залалданған жеміс-көкөніс өнімдерінің партияларын Қазақстан аумағына әкелу әрекетінің жолын кесті.
Заңбұзушылықтар Қырғыз Республикасынан келген автокөлік құралдарын тексеру барысында «Қордай» автомобиль өткізу пунктінде жүргізілген фитосанитариялық бақылау кезінде анықталды.
Тексеру барысында салмағы 800 кг болатын жаңа жиналған қара өрік партиясынан Комсток сымыры анықталды. Сонымен қатар жалпы салмағы 1 450 кг болатын екі партия шиеден азиялық жеміс шыбыны табылды.
Ведомствоның мәліметінше, анықталған карантиндік зиянкестер ауыл шаруашылығына айтарлықтай қауіп төндіреді, өйткені олар жеміс дақылдарының кең ауқымын зақымдап, таралған жағдайда еліміздің бау-бақша шаруашылықтарына елеулі зиян келтіруі мүмкін.
Фитосанитариялық бақылау нәтижесінде залалданған өнімнің барлығы қауіпті деп танылып, Қазақстан Республикасының аумағына әкелуге рұқсат берілмеді және жүк Қырғыз Республикасындағы жөнелтушілерге кері қайтарылды.
Құқық бұзушыларға қатысты әкімшілік ықпал ету шаралары қабылданып, қолданыстағы заңнамаға сәйкес айыппұлдар салынды.
Агроөнеркәсіптік кешендегі мемлекеттік инспекция комитеті қауіпті карантиндік объектілердің ел аумағына енуі мен таралуына жол бермеу, сондай-ақ Қазақстанның фитосанитариялық қауіпсіздігін қамтамасыз ету мақсатында мемлекеттік шекарада күшейтілген фитосанитариялық бақылауды жалғастыруда.
